星期五嗰日喺公司成日都好興奮, 因為放工後一班同事會北上食自助餐呀......           深圳大漁自助餐 : 我地一行9人去到大漁食自助餐, 啲野食都 OK 呀, 但喺間房食就好焗囉, 啲通風系統麻麻地咋, 差啲焗死 William 呀, 哈哈! 我覺得最正喺扇貝囉......不過細只左啲......同埋啲野食黎得慢左啲, 三個鐘好似唔係食左好多野...... 嗰餐自助餐氣氛都好好, 阿 Ann 啲廣東話好左好多, 大家有傾有講, 同事間相處得幾好, 我都好開心! 深圳蘭桂芳 SPA : 醫完肚, 我地去左按摩, 呢間野好大好豪好多野玩, 總之就好鬼正啦! 我同 Christy 沖完涼後喺入面傾計, 傾到唔記得出去大廳, 佢地梗係以為 Christy 暈左啦, 哈哈! 我地喺大廳一邊按腳一邊砌孖寶賽車, 之後我同 Christy 就去做中式按摩, 大約三點半就去打麻雀, 仲要係自動嗰隻呀, 打得我不知幾興奮......仲有錢落袋呀......       打完麻雀都六點啦, 個個入房訓......但係我就訓唔著, 喺房打機打到冇晒電, 唯有訓陣啦, 點知訓到八點多就醒左, 見佢地個個訓到死豬咁, 我就去左沖涼啦......十點多走去叫醒 William, 點知一叫就醒啦, 嚇得我......我以為佢會發脾氣咋! 大隊十一點幾就離開深圳......期待緊下次嘅 gathering 呀!