上星期 Katherine 帶咗佢個仔仔上嚟公司，嘩，原來佢個仔仔差唔多一歲架喇，好得意！上星期四放咗工去灣仔睇醫生，因為覺得啲感冒仲未清，醫生問我啲鼻水係咩顏色，我就話係黃黃哋綠綠哋色，跟住佢叫我“呻”出嚟俾佢睇吓，點知“呻”出嚟嘅鼻水竟然係透明，吹脹！

上星期五十號約咗阿 Joe、大雄、問米婆、陳慧琳、阿卿同 Katherine 去旺角別府食晚飯，目的係睇吓阿 Joe 個 BB 女，雅蘭間別府個格調好似和民又或者笑笑咁，黑黑暗暗咁！我哋七個人坐咗張好似六人枱度咁，見對面四位女仕坐得好迫，食嘢又要就住！我就俾人話點解夜晚嘅我好似比日頭黑咗又肥咗咁！

呢次食飯之前諗住同大雄夾埋問米婆買禮券俾阿 Joe 個 BB 女，但係臨星期五下晝問米婆話大雄唔買禮券，話各自各搞掂，於是我放咗工即刻去買禮券，但係當我送張禮券俾阿 Joe 時，問米婆竟然喺枱底塞錢俾我，原來佢哋以為我張禮券夾埋佢哋嗰份，咁我咪話唔係囉，搞到我好唔好意思呀！

因為想摼番買禮券啲手續費，所以我就打俾阿邦叫佢幫我叫佢個舊東亞同事幫我買，咁我費時落咗灣仔又返番屋企，所以我就去等湯米放工，跟住陪佢去攞身份證，遲啲都輪到我換喇，我喺度諗唔知會唔會喺換證時見到啲舊同學呢？！攞完身份證，我就同湯米返屋企，再出去旺角食飯喇！

十一號星期六返工返全日，好在三點三就走得，之後同湯米去旅行社睇吓有咩地方好去，跟住攞咗啲自由行資料就走喇，哈哈！喺 Cyber Port 見到我阿姨一家三口呀，十個驚呀，之後去旺角行咗一陣就返屋企喇！

星期日去康怡曬燈，終於用晒啲 Coupons 喇，之後去睇“隔住阿媽說愛你”，呢套係一套講姊弟戀嘅愛情小品，雖然套戲最後唔係大團圓結局，但係我覺得又幾好睇喎，可能我鐘意睇呢類戲啦，個男主角又靚仔，但係奧瑪花曼好老呀，反而估唔到梅麗史翠普都會咁搞笑，睇完戲去番銅鑼灣食嘢，跟住就走 lu！（P.S. 今日係中國元宵節）

星期一同以前人事部班同事食 Lunch，同 Winnie farewell，又走一個喇！去咗一間類似上樓私房菜嘅飯館食，都幾好食架！但係好貴，上菜又慢！

星期二十四號，情人節，原本同湯米都冇諗住出街慶祝，覺得呢啲日子兩個男仔喺街上面行，人哋總會用奇異嘅眼光望住，但係最後出咗嚟去旅行社問資料，但係仲未揀定去邊，諗過去澳門，去海南島，去台灣又或者去沙巴，之後去食飯，個氣氛有啲怪，唔通係因為佢話食咩我都話唔好？？？

星期三請咗半日假去見工，要填一份四頁紙嘅 Application Form，但係傾就只係傾咗十分鐘度，見完之後只有一個嘥咗我半日假嘅感覺，間公司叫 Tricor，個 Post 係 Assistant Administrator，做嗰啲嘢都 OK 嘅，但係機會又好似唔大咁，見完工見未夠鐘接揚米放工，於是去咗遊電車河，呢日終於訂咗機票同酒店，終於搞掂喇，目的地係泰國，之後去食印度咖喱，好好味呀，下次要再去食過！

星期四放工返屋企 Hea，瞓咗陣，搵咗陣工，Send 咗幾封信就瞓喇，好攰好攰！

尋日星期五返工好清閒，最怕就係呢種感覺，又冇乜印鑑咭要做，唉，其實舊年做 Appraisal 嗰陣都講過個 Workload 可以多啲！但係宜家都係咁！下晝個肥根喺我個位 Free Float，俾我見到佢睇我個月曆，頂佢八公個肺呀，“豬”事八卦，放工去做 Gym，有幾個新教練喎，好多人，又好似好耐冇去做尖咁，好懶，之前又病，要勤力番啲先得！

今日又係返全日，本來三點二就搞掂晒啲嘢，但係又係因為個伍小姐做錯嘢，搞到差唔多四點先走得，之後去旅行社搞埋啲尾數，再去三越買禮物，再去埋灣仔買埋 Printer 啲墨就返屋企喇，因為今日我老豆生日，所以成家落咗樓下食飯，好飽呀，我就送咗枝筆俾佢做禮物！真係乖仔喇！笑！！！但係佢好似冇咩反應咁！

今日湯米買咗好多唔同嘅朱古力俾我，好好味架！之前已經收到佢幾份禮物，有一條頸鏈，一部 ipod nano，同埋一隻 DVD，每一份禮物都好有心思，條勁鏈嘅喻意我好鐘意，同埋你唔係只係送一部 ipod nano 俾我，而係一部已經入晒歌入去嘅 ipod nano，你嘅付出我感受到，多謝你，但係我仲未送我要送嘅嘢俾你喎！再過多幾日你就會收到架喇！

上星期媽咪問我點解上個月嘅上網費會咁貴，原來係因為大佬個朋友幫佢部 Notebook 搞上網時較咗會成日上網，而我個舊 Plan 又係有 Limit 嘅，所以爆晒鐘，媽咪重要俾面色我睇，好無奈呀，下個月張單仲要二千蚊添呀！死得未！