星期日晚同阿單、Gloria，仲有 Raymond 一齊食飯，係同 Gloria 預祝生日，Gloria 就好啦，佢今日開始去一個月旅行呀，佢話會去美國，跟住返加拿大行畢業典禮，跟住再去日本，勁開心呀！仲要係屋企人俾錢去添，好羡慕呢！但係有個朋友仲係玩緊失蹤，我地每個人都搵咗佢好多次，都仲係未搵到佢，我地真係好擔心佢有事呀，我地愈諗愈擔心，我地喺度諗佢會唔會係避大耳窿，又或者佢屋企有事，可能又會係佢識咗新女朋友，掛住拍拖，又或者係佢個女朋友唔俾佢成日約朋友咁，但係最驚係佢身體有事，而去避開我地，希望佢一切平安啦！

尋日永亨唔知咩 System 發生問題，好似影響幾大，分行都受到影響，咁對我最大嘅影響就係過唔到機喇！幾驚要留到好晏呀，但係下晝啲退票要三點九先開始過機，好在四點半都做得晒同埋走得！已經唔係第一次發生 System down 咗唔做得嘢架喇，唉，宜家永亨仲要話排係香港唔知第六定第七大行，講俾人聽 System 成日有問題真係笑大人地個口呀，班 IT 又．．．每次發生呢啲事件，我呢個部門總會有一個現象，就係未做完嘅嘢應該由早班還是返晏嘅同事去跟呢？！每次見到佢地成日計住邊個有著數同邊個會蝕底嘅時候，就覺得兩班人就好似敵人咁，大家都覺得點解要蝕底去做，而唔係對方去做，啲氣氛令人好唔舒服！

P.S. 點解有個 O1 可以未做晒嘢就孭背囊走架，正一 Cheap 精一號！

今日食完 Lunch 返嚟，問米婆話我知十一月十九號要做 Drill，全人類都要返工！但係竟然宣佈呢件事嗰個人冇同出咗去食晏嘅同事講番，咁都得！？我第一樣諗到嘅事係偉哥放大假使唔使返呀？如果佢唔使返，我咪要由六點做到天黑？？？同埋之後星期六嘅 OT 又要排過，好煩呀，我原本十二月十號放 SAT 架，宜家變咗要 OT，又要搵人調，偉哥放三十一號 SAT，佢要 OT 架喎，唔好搵我替佢返埋下晝呀，好驚呀．．．．．．今年生日冇得放假已經好唔開心架喇，點知仲要返六點，宜家連生日之後嗰日都要返全日，想喊囉，灰爆呀！

今晚睇報紙先知林憶蓮個演唱會加場，仲要今日賣飛添呀，咦！！！好想買呀，但係諗諗下好似睇晒四場好傻咁，同埋星期一又要返六點，就算睇到佢尾場又點吖，又要心掛掛要返六點，都冇心情睇啦！好乞人憎呀！！！

今日係 Edward 生日，祝你生日快樂！