| «‹ September 2024 ›» | | S | M | T | W | T | F | S | | 1 | 2 | 3 | 4 | 5 | 6 | 7 | | 8 | 9 | 10 | 11 | 12 | 13 | 14 | | 15 | 16 | 17 | 18 | 19 | 20 | 21 | | 22 | 23 | 24 | 25 | 26 | 27 | 28 | | 29 | 30 | |
|
2005 年 12 月 3 日 星期六  |
| 全家攣到爆 |
分類: 未分類 |
呢個星期好乖仔，星期一到星期五都喺屋企食飯，冇去到街，哈哈，勁！傻傻地！
今日返工好眼瞓呢，但好在都叫做有啲嘢做，下午要 OT，四點先走，如果唔係偉哥將退票 Advice 啲面同底調轉咗，其實可以早啲走架，最慶竟然有人話點解我 Check 嗰陣時唔對埋個底，痴線架，不嬲都係 Officer 對完張票、Advice 面同底冇錯先俾人過機架啦，你哋班老狐狸唔好又賴我呀！
今晚去咗電影中心睇"全家攣到爆"，好好睇呀，講三對同性戀人搞結婚，而佢哋嘅父母有不同的反應同感受，編劇好有心思咁去用一啲情節去將本來毫無關係的人物去串連喺一齊！睇完之後有一種好溫暖嘅感覺，戲入面有啲父母對自己嘅仔係同性戀而覺得失望同無奈，而有啲就好開通咁去接受，有啲父母不喜歡自己個仔嘅另一半，有啲就希望自己可以融入阿仔同男朋友嘅生活入面，到結局，當然係各父母都接受自己個仔的取向同選擇啦！其實喺真實生活入面，我都好希望爸爸媽咪可以接受我的性取向，但我從來都冇諗過講俾佢哋知，除非佢哋自己發覺啦，因為試問有邊個父母想自己個仔女係咁吖，佢哋知道後可能會接受唔到，會失望，會問點解，會驚，會嬲，會擔心，好多好多個問號！其實我覺得最幸福的事就係帶自己的男朋友返屋企同屋企人食飯，但係呢個願望係奢侈的！
其實有啲朋友都知道我係鐘意男仔，有幾多個呢？？？我諗有十個度啦，其他唔知嘅就成日問我點解冇女朋友，其實有時真係好想坦白同佢哋講我唔鐘意女仔，但係又有幾多人會接受到呢？有時聽到朋友的對話會令我打消同佢哋講嘅念頭，例如朋友 A 話：「我 Join 咗 California 做 Gym 呀！」跟住朋友 B 的反應就係：「California 啲教練好多都係基架喎，你唔驚呀？」又例如朋友 C 話：「做 Gym 會俾基佬搞架！」聽到呢啲說話真係會令到我冇勇氣去對佢哋坦白，喺度想多謝接受同尊重我選擇的朋友，係，係你哋呀！
|
|
