今日起身覺得好凍，好似仲凍過之前兩日咁，天文台又話今日開始會暖番啲，呃人！

陳慧琳話陳慧蘭生咗個女喇，知道佢由下午一點痛到夜晚九點先生得，做人媽媽真係偉大呀，咁宜家佢咪可以唔使喺醫院過聖誕囉！

湯米今朝打俾我，喺電話度聽到佢喊我都唔知點算，個心好酸，差啲搞到我都喊，但最後都忍到！

放工搭船去尖咀搵 Trevor，當我去到尖咀打俾佢，打咗三次都冇人聽，心諗咁點好呢？最後去咗 HMV 行咗一陣，最後打第四次先有人聽，唉，真係差啲想返屋企架喇！佢話行落去旺角，佢又行得快喎，搞到我成日都跟唔到佢，我行到超攰，最後去咗朗豪坊八樓食泰國嘢，個環境同嘢食都幾好呀，但係啲服務就差咗啲，啲人好似好悔氣咁！食完飯去咗無印睇下有咩啱買嚟做除夕 Party 的禮物，大概都睇中咗啲，但係未有買到，再睇定啲先！

返屋企時好麻煩，諗住搭巴士，但係 Trevor 話可能會塞車喎，咁我就聽佢講，係聽佢講搭地鐵，諗住過咗海再喺金鐘轉巴士，但係去到金鐘先知金鐘出面都封咗路，冇巴士可以搭，當時個心諗早知搭西隧啲巴士啦，個心係喺度埋怨同咀咒緊個死仔 Trevor，最後要入番閘搭地鐵去上環轉巴士返屋企，原本只需要四個字至半個鐘的路程，宜家用咗一個鐘先返到屋企！

返到屋企睇新聞，見到啲南韓農民同警察發生衝突，一方面覺得佢哋好慘，世貿的決策令到佢哋的生計有問題，但另一方面又覺得佢哋好野蠻！仲有啲警察一方面用胡椒嘖霧嘖啲示威人仕，另一方面又用水炮射佢哋，咁樣咪即係幫佢哋洗走啲胡椒？？？真奇怪！