尋日成朝都流鼻水，好辛苦呀，呢幾日又真係好似有啲想作病嘅感覺！但之後飲咗杯傷風感冒熱飲就好咗啲喇！

安室出咗隻最新嘅MV 集，個封面好靚架！當我見到其實係有個衝動想買咗佢架，但係其實我都唔鐘意睇MV 嘅，我寧願買佢嘅Live DVD 喇！

前日去到HMV 想搵平井堅今年喺日本做嘅Tour Live DVD，但係都搵唔到，但係尋日去咗時代間CD Warehouse 竟然有喎，但係只有日本版，要三百幾同四百幾蚊，會唔會出港版架！

尋日湯米陪我去買除夕Party 啲禮物，喺City Super 見到Gloria 同埋Raymond 喎，跟住湯米就彈開咗，哈！成個銅鑼灣都好多人呀，好多人都買好多嘢，個個都拎住一袋二袋，而我買咗嗰三份除夕禮物，我覺得幾好架，哈哈！但係我唔想抽番喎！

尋晚勁歌金曲有林憶蓮呀，佢唱咗願、心野夜同為何他會離開你，唱願嗰陣都OK，唱心野夜時因為有少少Body Movement，而個咪又唔係好對到個咀，所以有時細聲咗，唱為何他會離開你時又唱錯咗歌詞，好似成個人都不在狀態咁，答問題時又好唔自然，哈哈！

今日係冬至，但係我冇得放早，但係湯米就有得放早，可惜俾我識穿咗佢會嚟搵我，之後去食Tea，本來諗住去剪髮，但係突然間肚痛，咁就返咗屋企瀉完先再去剪髮，今次好剪得唔係咁好呀！ 

今日阿琳話阿蘭仲未出得院，好似有啲事，之後問米婆問我哋幾時去探阿蘭同個 BB，我就話阿蘭都仲未出院，跟住問米婆問我點解，跟住我只有答唔知，因為我都唔知講唔講得點解佢仲未出院，都係當唔知算喇！好似呃咗問米婆添！