今日瞓到兩點幾，起身上吓網，食咗啲嘢，跟住就沖涼出去同舊同學打邊爐，呢班係IVE Year 2 同埋Year 3 識嘅同學，但係今次又唔齊人，得六個人咋，去咗尖咀稻香，食咗好多嘢呀，個環境都幾舒服吖，食到差唔多十點就去食甜品喇，去咗甜蜜蜜食咗個芝士布甸，一般好食啦，跟住差唔多十一點就散喇！

差唔多成年冇見過呢班朋友喇，今次見番呢，其實大家都冇乜大轉變，食飯時聽到佢哋講宜家返工啲嘢，都幾得意，佢哋全部都做番Logistics 啲工，大部份仲係係大公司度做！聽佢哋講有時Peak Season 時要做到九點十點，有時甚至OT 到十一點，有時假期又要返工，雖然係辛苦，但係聽得出佢哋做得係開心嘅，同埋真係用得番讀書時學到嘅嘢喺工作上，同埋覺得佢哋喺工作上有好大嘅滿足感，又學到嘢，因為佢哋係做埋同一個industry，所以成日都會交換行內嘅消息，慢慢覺得自己同佢地有啲脫節同埋有少少格格不入添！雖然佢哋返工時間長，但係回報也相對地高呢，佢哋一年起碼有十四至十五個月糧架，嘩！！！聽到都開心呀！我都想好似佢哋咁做到一份有contribution、involvement 同埋satisfaction 嘅工呀！