今日十點幾就起咗身，因為今日約咗舊同學去燒嘢食，呢班係中五之後嗰一年喺摩理臣山讀書時認識嘅朋友，因為當時所讀個 Course 個 Course Code 係 0190，所以 0190 就成為咗我哋嘅標記喇！有個舊同學住喺屯門，同埋我哋想探佢個 BB 仔，所以我哋就去屯門蝴蝶灣燒嘢食喇！本來今日有九個人去架，但係有個朋友要返教會，有個病咗，有個就女朋友有事唔嚟得，所以今次又唔齊人！

今日因為遲咗少少起身，所以遲到，本來想搭車落中環轉 962 入屯門，但係落咗車咁啱就走咗班車，因為己經遲咗同埋又要等幾個字先有第二班車，所以就決定咗搭地鐵去荃灣再轉巴士入屯門喇！好耐都冇搭過東涌線喇，今日搭番令我諗番起以前返青衣讀書時日日搭東涌線返學嘅情況，諗番以前成日都遲出門口，成日都要跑落月台追車，唔係 miss 咗班車又要等十分鐘，諗番以前考試時臨急抱佛腳咁喺地鐵度溫書睇 Notes，有時又會撞到啲同學一齊搭地鐵返學，一切一切回憶都是美好的！

入到屯門，一個熟悉的地方，一個以前曾經成日都會到的地方，一個對於我嚟講有好多回憶的地方，連我啲舊同學都會奇怪我點解會咁熟路，知道邊度有街巿，邊度有超級巿場，哈哈！好耐都冇去過屯門碼頭喇，地方冇乜嘢大轉變，諗諗吓，原來都係第一次喺蝴蝶灣燒嘢食咋，入到屯門諗唔知 Sunny 同阿德喺唔喺屯門呢？都有一段時間冇搵過佢哋食飯 lu，同埋重‘爭’Sunny 一份禮物！

嘩，今晚第一次睇到梁詠琪 Red Box 個廣告，好似好有一個勢咁喎！

今日又肚痛，唔通尋晚打邊爐啲嘢食未熟得透？？？今晚吹咗一陣風，個頭又有少少痛，又流鼻水，唔怕，聽朝瞓醒就會冇事架喇！

尋晚十一點幾返到屋企，發覺我老豆、媽咪同大佬都未返喎，少有喎，但其實係有少少擔心架！