計吓計吓，原來有成大半個月冇寫日記喇，實在太懶喇，寫番呢半個月發生咗啲咩事先！大約兩個星期前搵過Sunny 出嚟食飯，知道佢宜家有一個新男朋友，叫Kenneth，原來佢哋已經拍咗個幾月拖喇，當我知道佢搵到個新男朋友時，一方面替佢開心，另一方面又好好奇同八卦問咗好多佢哋嘅嘢！呢次出嚟食飯我先送番份聖誕禮物俾佢，係就係遲咗啲，但係希望啱佢用啦！

有個星期六同Mimi 預祝生日，嗰日下晝放咗工先去旺角買禮物，行咗好耐先揀到兩份禮物，呢兩份禮物係湯米同我夾份送俾Mimi 架，哈哈，夜晚去咗亞士厘道有間叫33 嘅嘢食西餐，環境食物服務同價錢都好．．．．．．唔多好，第二次同湯米見我啲朋友，今次介紹埋Carmen 同Emily 俾佢識，今餐飯湯米好似好悶咁，之後我哋走先冇Join 佢哋去飲嘢喇，之後去咗行Sogo，第一次行尖咀間Sogo，都幾好行吖！

上個禮拜同以前浙一人事部啲舊同事打邊爐，食完呢餐飯之後我覺得好Down，因為今次食飯個氣氛令我好唔舒服，其實好多同事已經去到唔同嘅公司做嘢，大家嘅話題亦好似變得少咗咁，佢哋講嘅話題我又唔多熟同清楚，我一路都只係喺度聽佢哋喺度講而冇插咀，但當我唔出聲嘅時候，就總會有人問我做咩唔講嘢，點解咁靜，尤其係我舊老細話我由佢嚟到咁耐我都未出過聲，要我講吓呢排我點，我真係唔知講咩好，我真係好想講佢咁樣令到我好尷尬，我唔開心唔係因為佢哋話我唔出聲，而係我覺得個問題係我唔識得點樣去同人Social！

至於返工方面，又係咁啦，因為臨近新年，上個禮拜比較多票，因為睇票睇得慢，所以俾人叫咗入房問點解睇得咁慢，哈哈，唔知咁樣算唔算俾人照肺呢？

今個新年冇買新衫同新褲過年呀，只係買咗對新鞋，媽咪話要買對新鞋‘採’小人喎！湯米竟然買咗兩對Converse，有對仲係同我一模一樣嘅白色皮Converse，抄我！哈！

之前部電腦中咗毒，湯米有日上嚟幫我Format 咗部電腦，宜家仲未裝番ICQ 同MSN 添！今日年初一就去咗睇春田花花同學會，有幾Parts 都幾好笑，笑到我標眼水，但係後半Part 就有啲悶場！呢幾日我都好似癲痲哋咁，有時一笑就笑到停唔到，有時又好似精神分裂咁對住湯米，哈哈，有時我真係好怕兩個人靜晒冇嘢講嗰種氣氛！

06 年過咗一個月喇，呢個月總括嚟講都過得開心嘅，雖然仍然係未轉到工，但係宜家已經用咗另一個態度嚟對呢份工喇，緃使每日都會見到唔想見嘅人，每日又要好早起身返工，但係宜家遇到啲唔開心嘅事就唔會太放上心喇，同同事呻完就算Lu！

今年喺工作上真係想有一啲新轉變，有時覺得自己真係好似一部電腦咁需要去Format 一下，洗走晒入面一啲唔好嘅嘢，跟住咩都重新嚟過，咩都Restart 過，你話幾好呢？！其實宜家我有好多嘢都想做，我想買份真真正正嘅保險，我想實實際際咁去儲錢，仲有好多好多嘢！希望每日都可以精神奕奕咁去做我想做嘅事，好好好想搵到一份工去滿足到我去做我要做嘅事！希望我做得到啦！