今日又肚痛，痾到我七彩，慘慘慘！！！放工行路返屋企，返到屋企好攰呢，瞓咗一陣先起身沖涼食飯！聽日又要返六點，所以今晚都係要早啲瞓喇！唔係聽日又會好似行屍走肉咁返工！

嘩嘩嘩！今晚睇到梁詠琪個新 Fancl 廣告，好靚呀，靚到爆燈呀！！！個 Look 好型！Cool！！！

呢幾日都喺度諗緊一樣嘢，究竟喺自己鐘意嘅人面前，應該係俾對方見到自己的所有嘅優點缺點，定還是每次見另一半時都要保持最完美嘅一面呢？就好似當還未正式拍拖時，即係大家都對對方有好感，但又未敢開口講出口的時候，即係我所稱嘅曖昧期，記得每次要出街見對方時都會悉心打扮，Gel 頭、嘖香水、諗住著咩衫襯咩褲，總是希望唔會失禮自己，以最好的一面去見對方，見面時又會客客氣氣，彬彬有禮，恐怕自己任性野蠻的性格會嚇怕對方，又會擔心臉上多了一粒暗瘡，唔好看了，食多咗嘢又會驚肥咗冇人會鐘意！有時又會花心思去買一啲小禮物或做一啲事情去俾對方驚喜，只係希望對方對住自己笑一笑，自己已經可以開心大半日，曖昧期間總是希望收到對方的 SMS 或者來電，話題總是源源不絶的，曖昧期係甜蜜開心的，但多數都是短暫！

當大家認定對方的身份時，開始拍拖了，慢慢有好多嘢都覺得係理所當然，漸漸唔留意自己嘅外表，容許另一半見到自己冇 Gel 頭，啲頭髮好似亂草嘅樣，俾佢見到自己成個黑眼圈，又殘又唔精神嘅樣！拍拖時間長咗，脾氣又會大咗，其實係自己冇去收斂自己嘅臭脾氣，自我中心又大咗，以前凡事都會為對方著想先，但係到最後可能會變得自私自利！臉上暗瘡多了乜不管了，橫掂都搵到另一半喇！開始放緃自己，係咁食係咁食，到有咗個肚腩先知自己肥咗，著咩衫都唔好睇喇！之前為對方製造驚喜的心思好似完全冇晒咁！給對方電話的次數少了，Dead Air 多了，感覺跟以前不一樣了！

可能你會話，大家一齊相處，唔同嘅階段會有唔同嘅相處方式同感覺！而對著自己鐘意嘅人，又何必要遮掩自己唔好的一面呢，應該要以最真嘅自己去對住自己的另一半！其實咁樣講都啱，但係又有冇諗過當初大家走在一起，對方係鐘意邊一個自己呢？再講，試問有邊個人會鐘意一個比當初認識時退步咗的人呢？

其實撫心自問，我完全犯晒以上嘅毛病，覺得自己“污 wear”咗，個樣好殘，暗瘡多咗，肥咗又有個肚腩，著嚟著去又係嗰幾件衫同嗰幾條褲，又成日發脾氣，好多事都會覺得係理所當然，我會警愓住我自己，唔可以再俾自己咁樣差落去！