好耐冇寫日記喇，一來自己又懶，二來呢排成日都好冇精神，一攰就走去瞓，所以差不多有成個月冇寫日記喇！呢個月發生咗啲咩事都唔係好記得喇，但係大概都可以從幾可面寫起嘅！
健康篇 － 自從去完泰國旅行返嚟之後，我就開始病喇，雖然只係普通嘅感冒，但係就好似點都斷唔到尾咁，好吓又差吓，最麻煩就係個喉嚨成日都痛，痛吓又好吓，我試過喺一個星期內睇咗兩次西醫三次中醫，感冒未清令我成日都覺得好攰，呢個禮拜開始叫做好番啲，但係個喉嚨仲係時痛時唔痛，點解會咁架！？唔通因為我今年新正頭時去過睇醫生，因為啲老人家話新正頭唔好去睇醫生架，如果唔係就成年都會病架喇！抑或係應驗咗睇相佬話我廿五歲之後啲健康運會下降同埋差呢？記得喺天生一對入面，當楊千嬅知道自己有乳癌時，佢對住塊鏡同自己個胸講：「我平日買最貴嘅Bra 你戴，又成日同你按摩，點解你要咁對我？！」有時真係覺得就算自己點樣愛錫自己嘅身體，點樣注意自己嘅健康都好，到病的時候就真係會病，控制都控制唔到咁，唉！好無奈！
家庭篇 － 呢排放咗工就即刻返屋企，盡量爭取多啲時間休息，已經成個月冇去做Gym lu，喺屋企嘅時間多咗，但係見爸爸媽咪嘅時間反而少咗，因為爸爸呢幾個星期每個禮拜都有一兩日做到好夜，媽咪就唔知點解呢排成日都去飲，大佬有時夜晚又要返學，佢哋夜返，而我又早瞓，哈哈！
愛情篇 － 湯米星期五開始去咗澳門做嘢，聽晚又要過去東莞，星期一夜晚先返，冇見湯米差唔多成個禮拜喇，好掛住湯米呀，呢排因為唔舒服，同埋有時搵工搵到有啲氣餒時，有時對住湯米啲脾氣會大咗，我脾氣大時，佢塊面好自然又會黑咗，有時真係差啲又鬧交架喇，好在最後都冇，好驚架！有時真係好唔鐘意佢黑面個樣呀，好乞人憎呀，討厭討厭討厭！
財富篇 － 唉！發覺自己真係越嚟越大使，每個月不單止儲唔到錢，好多時仲會使突咗，以前由讀書儲落嘅錢，都已經用得七七八八喇，見到紅簿仔啲存款越嚟越少，真係好擔心架！呢個亦都係唔可以辭咗宜家份工嘅其中一個原因，我唔可以再咁樣架喇，既然宜家冇開源嘅方法，咁就唯有慳啲啦！
工作篇 － 公司呢排都冇乜特別事發生，最大件事都係阿Joe 遞咗辭職信喇，我諗佢真係認真考慮清楚先做呢個決定，其實辭職真係要好大勇氣架，但係最重要都係身邊要有人支持！阿Joe 做到廿六號就走喇，由最初驚聞原來佢只係一個十九歲嘅小妹妹，到佢話要結婚，再到宜家佢已經係一個囡囡嘅媽咪，由當時直陰長直髮到宜家短咗少少嘅曲髮，變化真係好大！但點都好啦，祝阿Joe 離開咗呢間公司之後生活得更開心，快啲搵到一份人工高福利又好嘅工！
之前我替0615 返早時，有一日少咗張美金票，佢哋估張票應該漏咗喺個公文袋入面，但係個公文袋已經丟咗喇，個個都覺得係我做錯嘢，係我唔小心，但係當時冇一個人當面問我，個個都喺度話點解我會咁唔小心，唔知點解當時嗰種氣氛令我好想喊，既然你哋覺得我做錯，我寧願你哋直接同我講，鬧我點解會咁唔小心，而唔係個個自己喺度估，然後個個扮晒推理專家咁喺我背後話我，當時真係忍唔住入咗洗手間喊，喊完對眼紅到連我自己都嚇親，當時Send 咗個短訊俾阿琳話俾佢知我好想喊，因為我覺得成間公司最信得過嘅人就係佢！但宜家諗番起呢件事呢，其實都係好小事，根本唔需要同唔值得去喊呀！
其他小事例如四月開始返長短週，但係對於呢個部門嚟講只係多咗一個平日嘅下午Off，仲有係唔使搬去筲箕灣喇，仲有好多好多其他小事，不公平事，睇唔過眼嘅事．．．．．．
搵工篇 － 今個月嘅成績都幾好，總共有四份工有得見，但係因為時間夾唔到，只係見咗三份，除咗之前喺日記講過見過港龍，仲有in 過機管局同埋三菱，其實最想做都係機管局那份HR CLERK，係做番我以前Training 啲嘢，我對呢份工嘅期望真係好大，自問in 得都唔錯吖，又有相關嘅經驗，in 完之後幾日，我成日望住個電話，睇吓有冇電話搵我，好驚Miss 咗佢哋個Call，但係等吓一日，等吓又一日，宜家已經過咗成個禮拜喇，宜家真係知道咩叫做期望越大，失望越大，之後真係覺得好沮喪，好有挫敗感，搞到個人又唔開心，之後去見三菱那份工，其實真係冇咩心機去見，in 緊時我越傾越不耐煩，再加上個Interviewer 嘅態度真係好差，好！你態度差時我態度可以更差，我就同你玩嘢，你對我唔客氣，我亦毫不留情咁去寸你，橫掂我都唔志在做呢份工，但係最諷刺嘅係以我當日嘅表現，竟然可以即刻2nd in，但係我話我趕時間，唔等喇，當時個Staff 都呆咗一呆，跟住我就推門走喇，當時真係覺得自己好型，哈哈！
娛樂篇 － 呢排睇咗套戲，叫尋找他媽．．．的故事，好好睇呀，個女主角做得好好，個男主角又型，我覺得仲好睇過斷背山，套戲真係講到同交代到點解個仔同阿媽點解會發展到有咁深嘅感情，而唔係好似斷背山咁講到兩個男主角好似只係每年都出嚟偷情咁！另外就係睇咗套舞台劇孿到爗，雖然上次重演時己經睇過，但係今次睇都仲係覺得好好笑，仲加咗啲新料添！最意外係散場時見到楊千嬅同谷祖琳呀！！！上星期日去咗睇側田演唱會，好悶呀．．．Rundown 冇心思，啲衫又求其，再加埋我睇睇吓又肚痛，頂！！！
擔憂篇 － 呢排個人一有時間就諗埋啲無謂嘢，一來搵工煩啦，一諗到咁耐都仲未轉到工就開始擔心喇，今年我廿六歲喇，拖吓一個月，拖吓又一個月，好心急想走呀！同埋宜家個個都話出嚟做嘢都要有個Degree，我冇喎，會唔會轉唔到工架！？同埋諗到成廿六歲仔都好似冇乜計劃咁，又冇錢，老咗點算呢，又冇兒冇女，我係咪諗得多咗呢，成日都覺得轉咗工之後就可以儲多啲錢，讀番書，但係咪真係咁理想呢？我都唔知呀！！！
|
