四月二日，星期日，湯米仲喺大陸做緊嘢，呢日諗住全日都會喺屋企Hea，悠悠閒閒又一日，但係瞓到三點幾，起身食咗啲嘢睇緊報紙時，有人按門鐘喎，原來係我大佬個朋友上嚟幫佢整電腦，唉，當時我著住睡衣，頭髮又蓬鬆，點可以見人架，咁唯有返入房啦，就係咁，喺房度無無聊聊又瞓著咗，跟住電話響，原來係Raymond，佢問我有冇嘢做，不如出去食晚飯，但係我呢日都冇諗住會出街，所以話唔去喇，跟住到差唔多六點，大佬個朋友先走，終於自由喇，唔使再困喺間房度！
四月三日，星期一，湯米夜晚返嚟喇，之前諗住佢出咗去幾日做嘢，呢日返嚟應該會返屋企食飯卦，所以諗過星期二先約佢，但係佢話想見我，所以我放工返屋企沖涼等湯咪電話，湯米話大概七點會嚟到，但係最後七點七八先到，我老豆見我換晒衫坐喺度又唔出去，好奇怪咁問我喺度等人呀？！哈，當時我冇理佢，之後同湯米去天樂餐廳食飯，又貴又唔好食！＞＿＜ 湯米喺澳門買咗包豬肉乾俾我，但我話唔要，因為我知我收咗都係擺喺度唔會食嘅，唔想浪費，咁就俾番湯米喇，但湯米唔係咁開心！
四月四日，星期二，兒童節，之前本來諗住湯米出去做完嘢返嚟呢日先見嘅，同埋星期二戲飛又有平，咁就可以順便去睇埋之前想睇嘅死神再三來了喇，但係尋日湯米又出咗嚟同我食飯，佢今日都應該要返去同屋企人食飯架啦！咁我去做Gym 啦！好耐冇做Gym，好多生面口，好攰呀！
四月五日，星期三，清明節，朝早起身去鑽石山拜山，好多人呀，唔知係咪上山吹親呢，呢日之後開始流鼻水喇，拜完山去咗飲茶，嘩，有我好耐未食過嘅蛋散呀，好好味呀！之後約湯米去旺角行咗一陣，跟住睇死神再三來了，冇想像中咁好睇，感覺都幾嘔心，可能人老咗，唔係幾接受到啲血腥核突嘢！之前媽咪問我呢日夜晚煲中藥俾我飲好唔好，但係我話可能唔返屋企食飯，但係之後先知湯米呢日要同佢屋企人去食自助餐，咁我返屋企食飯啦，又可以飲藥添！
四月六日，星期四，今日本來帶晒嘢諗住放工去做尖，但係唔舒服，放工去咗睇醫生，返咗屋企，第一次開爐煲水食麥皮，好勁呀！
四月七日，星期五，今日同湯米一齊九個月喇，今日湯米都要返珠海做嘢，下晝先返，今日請咗半日假去見工跟住同湯米去慶祝，諗住見完工返屋企沖個涼換件衫再出去買禮物，但係1st in 完之後個Interviewer 叫我即刻入去愉景灣2nd in，就係咁，一來一回都差唔多五點喇，而湯米又早咗返，所以只係夠時間換咗件衫，連禮物都未買，就同湯米出咗去lu，本來想去之前喺飲食男女度介紹一間喺尖沙咀嘅Café 度食飯，但係諗諗吓都係等湯米生日先去，之後其實又諗緊好唔好改去一間中式西餐廳食，但係未講，湯米話不如去唱K，都好吖，好耐都冇去唱K 喇，但係我把聲聞到吖，連黎明啲歌都唱唔到嘅！就係咁，今日嘅行程打亂晒，唯有第二日先交換番禮物喇！
四月八日，星期六，SAT OFF，今日係Sunny 生日，朝早打過俾佢同佢講生日快樂，亦都同佢報定案係仲未買生日禮物俾佢架！原來同Sunny 分咗手一年喇！今日本來諗住好輕鬆咁剪完髮就同湯米出去，但係因為尋日唔記得找Citibank 卡數，咁今日又係Deadline，所以朝早九點就起身出去找卡數喇，費事又俾佢收我Late Charge，之後去咗剪髮，呢次又OK 喎，但係湯米話好似冇乜剪過咁！之後去銅鑼灣買禮物，之後湯米要攞西褲間鋪頭未開，想去天后間二手衫鋪睇吓嘢，但係湯米話不如過咗尖沙咀先，橫掂咁多時間，咁我就話不如搭船，行咗好耐，行得好慢，都只不過係四點半，間鋪頭仲未開，湯米話唔等lu，去咗九龍灣，夜晚喺屋企睇金像獎，都幾悶吓！今日同湯米交換咗禮物，我送咗條手鏈俾佢，佢就話見我個工事包好殘咁，送咗個新嘅俾我，多謝！但係佢唔記得撕個價錢牌，喺我面前先記得撕，哈哈，但係百密一疏，原來個袋入面有張單喺度！傻仔！
有時覺得事前計劃好晒每日做啲乜嘢，都總會俾其他事情影響到而有所改變，有時又會覺得即慶去做嘅事又會比預先計劃好去做的事嚟得好！
|
