星期一放工去咗同 Winnie 傾保險啲嘢，傾咗個幾鐘，初部都了解咗少少買保險嘅嘢！其實想買保險好耐，係時候應該為自己、為未來同埋為屋企人計劃一吓，其實買保險真係唔係咁簡單，我真係要睇清楚先好買呀！

星期二放工去咗一間叫 CMP Asia 嘅公司見工，見完都唔係咁啱，哈哈！但係喺毫無期望同壓力之下見工又真係會淡定啲架喎！

星期三食晏時 Perman 同我講咗啲嘢，令我又再為我嘅前途擔心喇，同埋有啲 Down Down 哋，Perman 講嘅嘢同阿 Nick 之前同我講嘅嘢完全一樣，我估係我舊老細同佢哋講叫我去進修一下，其實我嘅諗法就係轉咗工先去搵嘢讀，但係佢哋嘅諗法就係一路讀一路搵，其係我都估唔到我咁耐都仲未轉到工，其實我都覺得宜家做嘢真係好講學歷，少個學位真係好難同人爭，其實每次一聽到佢哋講關於我嘅前途問題時，我真係覺得好有壓力，我知佢哋都係想為我好，出於關心我，但係佢哋唔多唔少都令我感到有少少壓迫感！雖然要進修唔係為咗人哋講嘅某一啲說話，係為咗自己嘅將來，但係其實我某程度上都幾好勝，我唔想衰俾佢哋睇，我就當佢哋講嘅嘢係我嘅推動力啦！

星期四放工返屋企，難得自在的一天！

星期五放工同湯米去做尖！究竟幾時先可以減到個肚腩呢？

今日放十二點，好似好耐都冇放過十二點喇，唔係放十一點，就係要 OT，一係就係放 SAT，放工去咗先施，媽咪陪我買皮鞋，好嘢，跟住湯米陪我去食麥記，再落銅鑼灣唱 K，都算唱得耐，跟住去莎莎買咗支 ISSEY MIYAKE 香水做母親節禮物，喺莎莎買比喺西武買平成幾十蚊架！聰明！嘻嘻！跟住搭電車落灣仔食 Pizza Hut，食咗個變心批，一般好食啦，超飽呀！跟住就去 Art Centre 睇“你咪理，我愛你，死未！”都幾好笑，有一場笑到我標眼水呀，用輕鬆嘅手法去講唔同嘅戀愛態度，由約會，拍沲，結婚，生仔，離婚，到老，死亡，當中有少少灰嘅地方，睇完都幾 Warm，但係投入感就唔係太大，哈哈！

總結嚟講今個星期都算幾煩惱，諗讀咩好，揀邊間學校好，要點報名，讀邊科先，周圍問朋友意見，自己應唔應付到，讀咗書仲搵唔搵工住？好多好多問題，好多謝每位俾過意見我嘅朋友，唔該晒！