今日 1467 朝早打返嚟俾 0082 請病假，我返到公司聽到 0082 好似癲咗咁好大聲話啲人都唔知係咪真係病，尋日仲嘻嘻哈哈咁返工，今日就病，仲要揀今日多票先嚟病，真係識揀喇！聽完真係好反感，其實 0082 有咁嘅諗法真係一啲都唔健康，成日都諗咗去負面嗰邊，不過算啦，又唔關我事！

阿琳尋日同我講今日阿 Joe 會過嚟同佢同埋問米婆食晏，問我去唔去（唔係，好似冇問我，係行埋嚟通知我一聲！）但係我之前已經約咗舊同事食飯喇，所以我去唔到，但係唔知阿琳係講笑定講真咁叫我食兩次啦，跟住今日食完晏返到公司樓下見到阿 Joe，佢又話一齊食啦，橫掂我都就走唔做咯，佢哋咁講令我諗到係咪遞咗信之後做咩都冇人理架呢？！！咁咪好著數？？？其實就算冇人話，自己都會唔好意思啦，雖然係要離開呢間公司，但係都唔好做到咁過份！

今日阿好同阿 Car 都話我就咁走咗，不負責任喎，要佢哋每日睇多幾百票，哈，咁都得呀，雖然知佢哋係講笑，但係都覺得佢哋咁講幾白痴架！每個人都可以走架喎，我唔似你哋，我唔甘心就咁喺呢個部門做一世，我唔想老咗好似 0082 又或者好似個溫先生咁，好似維園阿伯又或者係巴士阿叔咁！真係人都癲呀！返多三日就走喇，講真我真係一啲唔捨得都冇，呢個部門甚至呢間公司係冇嘢值得留戀嘅，做嘅嘢唔講啦，只係啲人已經夠奇特啦，呢個部門只有 Albert 同 Perman 叫做正常同埋係一個好人架咋，其實呢個部門似一個老人院多啲囉，個個都係講是講非嘅阿婆同阿伯！走，我都要付出架，唔係好似你哋講到就咁遞咗信講一聲就走，唉，好激動添，算啦，人各有志，佢哋有怇哋安於現狀同不斷埋怨，我有我自己嘅目標同方向！同埋 Karen 講得啱，我喺永亨做多三五七年，永亨都唔會俾到呢個價我啦！

今日見到阿琳幫 Winnie print 嘅一張 List 上面，喺 Duty 一欄我係空咗架喎，原來我係冇 Duty 架，哈哈，其實我平時有咩做呢？可能喺好多同事眼中，我真係冇乜嘢做，好得閒，一日只係做幾叠印鑑卡，睇票又唔係快，轉數又慢，以前會好介意人哋點睇自己，慢慢就會覺得其實自己真係懶散咗喎，工作效率真係冇以前喺 Training 時咁高，人哋對我有咁嘅 impression 其實係一個警號，但係喺呢個 Dept 做嘢就係咁，一日最多得十幾叠印鑑卡，有五個 Clerk 做，唔通真係要去搶印鑑卡返嚟霸晒嚟做咩，收喺櫃度又俾 officer 話，做得快做完又冇嘢做，做得慢又俾人寸，真係頂你個肺，一個二個冇嘢做咪又係入晒倉吹水，連 officer 都要問 clerk 有咩做，係咪痴架！？但係返到新工真係要醒啲喇，要做番以前 Training 嘅陳鍇輝，努力加油！

今日食晏時勁大雨，舊同事同我 Farewell，多謝晒，但係唔知點解每次一見到舊老細我就冇咩話題，成個人都好唔自然！好驚講錯嘢又或者講啲嘢太輕佻，成日都覺得佢有一種氣勢同威嚴！哈哈！

下星期一同問米婆同鄭小姐同一啲舊同事食晏，計埋我有七個人，但係得我一個男仔，跟住問米婆話：「睇吓你幾巴閉，六個女仔（女人）同你 Farewell！」聽完都幾無奈，你哋平時食晏都係咁多人架啦，星期一都係加多我一個姐，使唔使講到咁呀，同埋有幾個人我唔係咁熟架喎，同我 Farewell 會唔會唔係咁好意思呀！可能佢哋連我叫乜水都未知！唉！

今日放咗工去咗買禮物俾湯米，因為下星期三係我哋一齊第十一個月喇，買完嘢就返屋企喇，但係等車等咗好耐，頂！返到屋企見到我大佬喺度打緊機，又放假，喺度阻住晒，我就嚟忍受唔到間屋咁細喇，佢仲要霸住個廳喺度打機，頂！

今日對於湯米嚟講係一個大日子，因為今日關淑怡出演唱會 CD，但係湯米食晏出去唱片鋪度買但係買唔到，因為未返貨，佢話放工再去買過，我諗佢宜家一定係喺屋企煲緊碟喇，哈！