尋日阿琳同 0081 都放 Sat，所以由我嚟做本票，呢次係我第一次自己親手由頭到尾一手一腳去做，亦都係我臨走前最後一次去做！都做得幾好吖，由頭到尾都唔使問人，除咗只係問左 Katherine 有個 File 攞喺邊咋！哈哈！

尋日無意中睇到個 Report，個新人竟然用 24 秒睇一張票，哈哈，咁比之前用 40 秒睇一張又真係快咗好多喎！！！唔知佢知唔知其實係要六秒之內睇一張票嘅呢？點都好啦，我反而想知點解冇人話佢嘅，唔通因為佢仲新，抑或 0199 驚話佢，嚇親佢，驚佢唔做？？？記得我第一日學用 ICS，我用咗六秒睇一張票，0199 已經話我喇！

聽啲同事講，我走咗之後好似唔會咁快請番個人嚟替我，唔通我呢個位係多餘嘅？我最想知係邊個會替 0615 返六點呢？哈哈！今日聽問米婆講，原來 1467 替 0082 返早係返六點半架，因為 1467 同 0199 講話女仔？女人！返六點咁早好危險喎，所以要求返六點半，我聽完真係笑咗出嚟，佢都會有危險？？？唔好玩啦，佢又唔係後生，又唔係靚女，乜遲半個鐘出門口會安全好多咩？哈哈，係都諗過第二個理由吖，唉！其實我咁笑人又真係唔係咁好，話晒佢都係一個單身女子！哈哈哈哈 x 10000 ！！！

尋日係最後一次星期六 OT，四點度走啦！本來諗住同湯米去食 TEA BUFFET，但係太晏喇，唯有下次食過啦！湯米送咗隻 SK LIVE 2CD 俾我，但係我宜家都仲未聽晒，哈哈！但係本 Booklet 啲相真係好靚！跟住行咗一陣銅鑼灣就去食香辣屋，都唔好食嘅，都幾失望！跟住就去做尖，好少人，超好，哈哈，做完尖好攰呀，返到屋企刷完牙洗埋面就瞓喇！zzzZZZ  

今日瞓到差唔多兩點，湯米要入馬場做嘢，哈哈！hea 到六點出去同湯米攞褲同食飯，跟住行咗一陣就返屋企喇！搭緊巴士時，我話今個月冇糧出喇，同埋新工要廿五號先出糧，湯米知我要賠番錢俾舊公司，跟住佢就問我夠唔夠錢使呀，聽到呢句說話之後我覺得好舒服，好似成個人鬆晒咁，好安心，雖然我唔係冇錢到要問人借錢，但係聽到湯米咁講會覺得有個人喺度支持緊自己咁！哈哈！雖然賠完錢俾舊公司，同埋找埋今個月啲咭數，我諗我啲積畜真係得番零，但係唔緊要啦，呢個月咪再慳啲囉，返咗新工之後應該會好好多架喇！

陳慧蘭上星期五去奧海城滙豐度見工，原來佢特登過嚟同我哋食飯，真係唔好意思，去唔到，我哋十九號再食過晚飯啦！同埋你下次見工聽清楚啲喇，連人哋約你幾點去見工都聽錯，哈！