六月六日星期二，呢日係我喺永亨銀行返工嘅最後一日，呢日請咗部份同事食一啲小零食，算係我對佢哋嘅小小心意啦，食晏遲咗少少返去，因為去咗美心買西餅，湯米話臨走請番啲同事食嘢係禮貌嚟架！臨放工時有啲同事行埋嚟同我講再見，搞到我唔知點咁，好似有少少唔捨得，但係走咗之後呢種感覺好快就冇咗喇！阿琳同阿卿都送咗啲糖俾我，多謝晒！放工去做尖，做完尖返屋企食埋飯都好攰喇，真係好喇，一瞓落床就瞓著，幾驚諗嚟諗去瞓唔著呀！

六月七日星期三，第一日返新工，因為返八點半，所以可以七點先起身，實在太好喇，以前七點就要返到公司做嘢喇！終於都可以瞓夠先返工！八點三就返到公司，可惜 Office 入面一個人都冇，只係見到個茶水阿姐，佢叫寧姐，佢知道我今日會返工，所以佢帶咗我去我自己個位度坐，一路坐一路等，八點五仲未見有人返，到八點半，仲係一個人都冇，心諗，係咪返八點半架？！八點半過少少，聽到有人叫：「早晨，阿 Chris！」呢個就係同我一齊做嘢嘅男同事 Terence，第一日返工都冇咩做，但係就要做個 e-learning，仲要做第三次先 Pass，今日同一大班同事去食晏，好嘢，佢哋請！呢日係我同湯咪拍拖第十一個月嘅日子，我送咗支 Boots 嘅洗面 lotion 同埋一支係屋企偷出嚟嘅保心安油俾佢，哈哈，而湯米就送咗件恤衫同埋一啲文具俾我，佢話等我返新工用呀，好嘢！

六月八日，星期四，第二日返新工，又係好悶，成日都只係入吓 file，影吓印咁，其餘啲時間都係幫手執嘢準備搬 Office，食晏時個男同事同我講原來佢喺度己經做咗八年，中間有幾個月時間走過，跟住又俾人叫番返嚟做！嘩，做咗八年，真係唔係一個短時間，我只係諗住喺度做一至兩年架咋，哈哈！放工去做尖，跟住就返屋企喇！

六月九日，星期五，逢星期五可以著 Smart Casual 返工，真係好喇，今日又係執嘢執嘢同執嘢，好攰呀！今日放工時要 Set 埋 Training Room 先走得，所以遲咗少少走，今晚本來約咗 Karen 同埋 Shelley 食晚飯，但係因為朝早掛咗黑雨，所以 Karen 話取消喎，臨放工時湯米打嚟問我今晚個 Dinner Cancel 咗有冇飯食，咁跟住就變咗同湯米去食飯喇！本來諗住去食峰壽司，但係太多人喇，所以去咗壽司亭食，出奇地少人喎，食完嘢去食埋糖水就返屋喇！

六月十日，星期六，好嘢，以後星期六都唔使返工喇，又可以瞓晏啲喇，今日遲咗起身，湯米由觀塘過到嚟我都仲未換好衫，要佢等咗半個鐘，跟住見佢個樣有少少變臉，咁我就唔出聲喇，之後落咗銅鑼灣曬燈，跟住本來諗住去做尖，但係湯米突然間話唔去喇，好驚呀，佢嬲呀，原來佢嬲我冇氹番佢！跟住氹番湯米之後就去做尖喇，做完尖再去康怡睇海神號，冇我想像中咁好睇喎，交代人物關係好似唔係好夠！普通戲一套！

六月十一日，星期日，呢日瞓到好晏，跟住夜晚去咗天樂里 Neway 唱 K Buffet，啲嘢食都 OK 架喎，但係就唔係好識唱啲新歌，不經不覺唱到十點幾，跟住就走喇！

六月十二日，星期一，呢個星期可以全個禮拜都著便服，因為老細話咁樣方便搬嘢，今日都係執嘢，唉，啲嘢多到執極都執唔晒，啲文具多到嚇死人，今日個 supervisor 同埋個男同事下晝過去 PP3 睇吓新 Office，個男同事交低好多嘢俾我做，但係又唔講清楚點做，討厭！放咗工之後去做尖，今日係陳慧蘭生日，跟住 Send 咗個 sms 俾佢！

六月十三日，星期二，呢日返工又係執嘢，下晝個男同事同個 supervisor 又出咗去，又俾咗好多嘢我做，又係講得唔清唔楚，但係覺得佢哋唔係度都幾好，起碼唔使煩！

六月十四日，星期三，呢日全日都係執嘢，忙到傻，放咗工湯米陪我去試戴隱形眼鏡，試咗好耐先學識點戴，搞笑，跟住就去食飯，然後去 e-house 攞身份證，好多人呀，要等一陣，一睇張身份證，咦，比我想像中好喎，哈哈，攞完身份證就上去做尖喇！

六月十五日，星期四，今日個男同事教我用 Projector，連啲線點插都講埋，佢當我真係白痴，同埋佢教人個樣同啲語氣好乞人憎，我想死呀！頂佢！放工去咗剪髮同做 Facial，好 Relax 呀，又好舒服！跟住返屋企食飯！

<待續>