六月十八日，星期日，呢日要返新 Office 執嘢，十一點返到公司，老細已經係度喇，到我拆自己個箱時，發現有人唔小心倒瀉咗杯奶茶入我個箱度，全部文件都係奶茶漬，好在冇擺自己啲嘢落去咋，跟住執吓執吓，四點鐘我就走先喇，因為夜晚約咗 Mandy、Jennifer、Emily同埋 Mimi 食飯，同 Mandy 慶祝生日，放咗工之後就去買禮物，好快就睇啱買咗個銀包喇，之後仲要去買父親節禮物，買咗條皮帶俾老豆，跟住仲要買埋媽咪嘅生日禮物，又係好快就睇中咗條類似絲巾或者披肩嘅嘢！短短個幾鐘就買齊晒啲禮物，真係好喇，從來都未試過咁有效率呀！同 Mandy 佢哋去咗 ucc 食飯，啲嘢食一般啦，傾咗個幾鐘跟住就走喇！食呢餐飯順便送番之前喺泰國買嗰份生日禮物俾 Emily！其實一路都冇時間見到佢，呢日見面先知佢原來喺佐敦開咗間鋪賣衫！搵日去撞吓佢先！呢晚肚痾，慘！

六月十九日，星期一，正式第一日返新公司，預早咗出門口，但係咁啱中環撞車喎，搞到有少少塞車，好在都冇遲到，呢日主要都係 unpack 番啲箱，執番好啲嘢，跟住有人嚟教點用 Training Room 啲 Equipment，同埋教點用 Video Conference，教我哋個人叫 Marco，好似林峰架，哈哈哈！呢日本來約咗阿琳佢哋食晚飯，但係陳慧琳病咗，所以取消咗，原來我哋真係俾人落咗詛咒，點算？！放咗工去咗買生日禮物俾湯米，因為一早就諗好買咩同埋去邊度買，所以好快就買咗喇！