七月十四日，星期五，今日終於取消咗 Netvigator 個 now 服務，唔使再俾佢收多我錢，今日 ITS 有人嚟教我哋點樣 Set Up 個 Video Conference，以後要用就要靠自己喇，冇 IT 人喺度 Stand by 架喇，唉，有啲擔心添，但係一日唔自己做過，又真係唔識嘅！唯有抱住學多樣嘢嘅心態去做啦！今日收到 Poly 寄嚟嘅信，叫我下星期三去 Interview，突然間覺得好緊張呀！

七月十五日，星期六，今日去咗曬燈同做 Gym！

七月十六日，星期日，同湯米去咗睇超人，其實我真係冇乜興趣去睇呢種戲，但係知湯米鐘意睇呢類戲，所以就去睇，毫無期望咁去睇，但係比我想像中還要悶，都唔刺激，有啲地方仲有啲牽強！但係個票房好似有成二千幾萬，點解呢！？今日仲去咗買生日禮物俾阿琳，全部嘢都係 Chip ‘n’ Dale 啲嘢，有人字拖同毛巾，全部都可以喺屋企用架，其實唔係想買人字拖架，係想買公仔頭好得意嗰啲毛拖鞋架，但係搵唔到，但係最激氣係之後某一日喺 Sogo 竟然俾我搵到！吹到啤一聲！

七月十七日，星期一，今晚又有 Summer Lecture，要六點九先走，跟住都返屋企喇！沉悶的星期一！！！

七月十八日，星期二，今日 Terence 叫我下星期個 Course 嘅其中一份 Handout 要放大印做 A3 size，因為有個弱視嘅同事嚟上堂，我第一個反應就係問咁佢平時點做嘢架，平時啲文件都唔會特別放大俾佢睇架啦！真奇怪，但係公司絕對唔可以因為咁樣而歧視佢！放工如常同湯米去做尖，又係好多人！

七月十九日，星期三，朝早請咗半日假去 Poly interview，好早就去到喇，唔知點解遲嚟嘅人可以見先，到我見時好緊張，又係兩個 interviewers，一個外國女人，一個本地男人，個女人好 nice，但係個男人就有啲寸，佢哋都係問我點解要讀 HR 呀，覺得 HR 對一間公司有咩重要，個鬼婆就問我讀完書之後會唔會留番喺宜家間公司做（有咩關係呀？）又問我同時做嘢同讀書有咩 negative aspects，鬼唔知會少咗啲私人時間咩，咁都問！完咗 interview 就返屋企喇，仲趕得切去麥記食個熱香餅，真係好好味！晏就返工都唔係太忙，五點九度就放工過去旺角同阿琳、阿 Joe、問米婆同大雄食飯喇！去咗王家沙食，同阿琳預祝生日，啲嘢食好快就上齊，好快又食完，但係好似叫得太多，食唔晒，要打包，今晚問米婆同周大雄成日密密斟，而阿琳同阿 Joe 又佢有佢哋傾，搞到我好似搭枱咁，唉，九點幾就走喇！

七月二十日，星期四，今日老細話胃痛，唔返公司喇，但係佢下晝要去 Exchange Square 教書，搞到我要拎部 Laptop 俾佢，連 OA 嗰份都做埋，但係都幾好吖，可以出去行吓，抖吓！放工去做尖，知道 Raymond 聽日就要飛去上海做嘢喇，所以約咗佢去飲嘢，原來佢仲未食飯，於是去咗太興，坐咗陣就走 lu！

七月廿一日，星期五，今日去咗洗牙，洗完牙同湯米去咗書展，好多人排隊入場，但係入到去就唔係好多人，都唔係好迫，湯米買咗本地圖同鄭伊健本相集，本地圖好好架，介紹埋邊區有啲咩玩同有咩好嘢食，而我就買咗萊斯寫梁祖堯嘅書，行到十點就走喇，好攰呀！