尋晚同湯米因為一啲事嘈起上嚟，其實我尋晚啲態度又真係差咗啲，好在今日冇事喇！
雖然尋晚好夜先瞓，但係今朝起身都幾精神，今日返工冇乜嘢做，因為下個星期啲 Courses 我已經準備好晒，但係今日唔知點解突然間話聽日有個 Course 喎，其實只係我一個唔知，好憎佢哋成日有啲咩都唔同人講，叫人點做嘢呀！
今日係同湯米拍拖一年零一個月嘅日子，放咗工同湯米去咗 Pacific Coffee 飲嘢同交換禮物，我收到一個又大又靚又實用嘅袋同埋一件 Tee，湯米就收到一對 Birkenstock，但係我買大咗，搞到要去換，仲要係買大咗兩個 Size 添，之後我哋就去新高麗苑食韓國燒烤喇！我覺得呢間好過嗰啲漢陽苑好多呀，又乾淨又企理，雖然唔係太多嘢食，但係就好食好多！食完飯去咗玩具鋪行咗一陣，跟住就搭電車返屋西環食糖水喇！
今日去咗恒生同東亞問 Education Loan 啲資料，但係太多人喇，都問唔到啲咩？
湯米話唔知佢自己係唔係一個好嘅男朋友，一時係一時唔係啦，其實我都唔係一個好男朋友，冇人可以做到完美情人，人總會有情緒，有喜怒哀樂，就算對住自己最鐘意嘅人，都會發脾氣同鬧情緒，所以呢，唔使咁介意自己係咪一個好男朋友，做番自己，大家一齊開心咪得囉！
|
