前晚差不多兩點先瞓，但係尋日八點半就起身去銀行交學費同埋要趕喺十二點之前過去 Poly 做 Register，好趕呢！本來諗住搭隧巴，但係湯米話搭地鐵會快啲，就係咁，由恒生總行行去中環站，去到尖沙咀站再行去尖東，跟住再搭巴士，好在趕得切，最搞笑係中環站上車時，我衝咗入地鐵，但係湯米趕唔切，入唔到，哈哈哈哈！之後去咗尖東間元氣食晏，唔得呀，感覺好唔乾淨，有啲壽司又散散哋，食完之後就去沙田做尖，湯米話去架，對上一次去沙田都好耐喇，應該係同 Trevor 去架，有一年喇！夜晚同問米婆、阿琳、阿 Joe 同埋佢個囡囡穎怡去咗德米食飯，嘩，有 Live Band 架，穎怡初初瞓著咗，但係好搞笑係唔知幾時佢一擰轉頭就醒咗，但係冇喊喎，好乖呀，成晚都冇喊過，仲肯俾我抱添，食到差唔多八點就走，跟住同湯米去咗 Andy 間鋪度 Hea 到九點幾就去睇戲！
今日好好天，去咗淺水灣，搭巴士去時架巴士差啲死火，去到沙灘好多人呀，夜晚去咗睇死亡筆記，冇我想像中咁複雜，都唔係太難明，但係有啲地方好似有啲牽強咁，個故仔都幾特別同創新，都係啲日本人先諗得到！
|
