上星期三，放工約咗 Sunny 去旺角食飯，去咗八麵玲瓏食，呢間嘢之前係麵軒嚟嘅，但係除咗個名改咗之外，其他嘢都好似冇變過咁！食完之後行咗一陣，想買衫，但係又心大心細，最後都冇買到！最近先知 Sunny 阿爺啱啱走咗，搞緊啲身後事，嗰晚食飯時，Sunny 個男朋友啱啱放工搭車返屋企，佢個男朋友竟然 Send 咗十幾個 sms 俾 Sunny，好搞笑！

上星期四，放工冇去做 Gym，去咗剪髮，剪短咗，又係搵個女人同我剪，但係都唔係咁啱心水，下次都係去番 HIP 剪喇！！！

上星期五，約咗 Edward、Kent 同埋 Michael 去旺角食飯，我竟然係最早到，佢哋個個都遲到，Edward 返咗嚟香港半年，呢次先第一次同佢食飯，同佢哋差唔多有成兩年幾冇見過喇，但係佢哋都冇乜點變，估唔到我仲可以同番啲小學同學保持住聯絡！

上星期六，要返公司搞少少嘢，湯米第一次上嚟 Office，搞完少少嘢就帶咗湯米去食一間我覺得好食嘅鋪頭食晏，好在湯米都話好食，之後我哋去咗做 Gym，但係我好似作病咁，好攰，夜晚就一齊去做 Facial，跟住同湯米去咗食印度嘢，間鋪頭好近我屋企，但係我都係第一次去，都幾好食！

星期日，去咗尖咀買洗頭水，再去旺角信和買Christina Aguilera 隻新碟，之後本來想睇魔蟲入口，但係搵唔到邊度有得做，變咗去奧海城食石頭飯，再去灣仔食糖水！

星期一，放工返屋企，沖涼食飯執嘢跟住就瞓覺喇！今日收到 Raymond 個電話，原來佢返咗嚟喇，到九月中又去北京喇，真係好呢！

星期二，呢日開始我帶飯返公司食喇，個個同事都覺得好出奇，哈！放工同湯米去做尖，做尖之前我又帶咗湯米去咗一間食麵嘅鋪頭食嘢，我覺得個湯同牛丸係最好味架！湯米送咗隻 Paris Hilton 嘅 CD 俾我，但係冇我預期中咁好聽！有少少失望！

星期三放工就返屋企，星期四放工就去做尖，星期四有機會過去 PP1 個 Office，好靚呀，我都想喺 PP1 返工呀，樓下又多嘢行！

星期五，返工超忙，未停過，要七點先走得，跟住搭車過去火車站，去咗一間好大油煙味嘅黑店食飯，啲人又鈍，又漏單，上菜又慢，又唔好食，頂！好趕咁食完去睇王力宏演唱會，坐廿六行，都睇到喎，氣氛比我想像中好好好多！好多 OL，啲女仔好熱情，但係我對佢啲歌就唔係咁熟，仲有王力宏走音喎，啱啱開場時仲跣低咗，總括嚟講都幾好睇，但係又冇乜共鳴，最好反應都係張學友出場，好在王力宏夠靚仔，同埋真係好佩服佢識玩咁多種樂器，同埋佢跳舞都幾好架喎！

今日瞓到兩點，哈哈，去咗曬燈同做尖，又激嬲咗湯米，好在最後都冇乜嘢，去咗 MIX 飲嘢，跟住就同佢返屋企喇！