上個禮拜返工好多嘢做，有幾日七點幾走，最夜仲試過八點半先走，但係同以前喺銀行做 Training 做到九點幾十點，八點幾走都唔算好夜架喇，況且 OT 有得補錢，唔錯啦！但係唔知係咪人老咗，覺得連做十二個鐘真係好攰，抑或係啲感冒未清，所以搞到個人成日都好攰呢！？？？

呢兩個星期返工嘅氣氛好似好咗咁，可能諗通咗一啲嘢，唔會咩都咁上心，其實真係可以嘻嘻哈哈又過一日！公司出年二月十號搞 Annual Ball 喇，啲同事已經問人去唔去，使唔使咁快呀？？？其實去唔去好呢？？？其實去可以當係見識吓大場面，但係去到又唔知會唔會好悶，係咪要同人 Social 架？哈哈！

新嚟個 OA 做嘢真係唔係太整齊，同埋開始覺得佢成日都好似遊魂咁，又冇記性，又成日講賤嘢！唉！

月尾開始返學喇，逢星期一同星期四都要返，下星期六仲要去 Orientation 添，心情開始有啲緊張，唔知啲同學會點呢？多唔多功課呢？啲嘢難唔難呢？放工跟住去返學會唔會好趕呢？一諗起就好驚，呢排又成日發惡夢，點樣可以放鬆啲呢？

尋晚同湯米一齊去睇蔡依林演唱會，期待咗好耐架喇，但係冇想像中咁好睇，啲衫又唔靚，唱得好似冇咁好，但係大部份想聽嘅歌都有唱到，而佢跳舞真係好掂，又唱又跳，其實真係好過好多人架，成晚嘅氣氛都唔錯，可惜坐我附近嘅人都好靜，冇企起身，搞到我又唔好意思起身，可惜！！！