尋日返六點，冇想像中咁眼訓，但係唔眼訓都睇錯票，激死！！！之後十一點就放工喇，之後去找咭數，唉，呢次又遲交咭數喇，近幾個月成日都好冇記性，唔記得交咭數啦，又唔記得俾家用啦，又唔記得轉數去支票戶口，到開支票時又俾人扣錢，又成日唔記得拎銀包呀、鎖匙呀、電話呀、八達通呀．．．點算！！！之後去唱 LUNCH K，行左旺角一陣，之後拎完禮品就去九龍灣喇，終於有機會睇番憶蓮九六年個音樂會喇，好開心，如果當時可以親身去現場睇就更好喇，晚飯係去大家樂買外賣食，好飽！！！係屋企睇亞洲先生選舉，都幾搞笑，但係泳褲環節班女人好似前世未見過男人，成班色中餓鬼咁，哈哈！！！

尋晚訓下醒下，訓得唔好，所以今日個人有 D 攰，個樣又好唔精神，其實一年三百六十五日之中，我諗有三百三十日我個樣都係好似未訓醒咁架喇！！！個樣越黎越殘，唉！今朝醒左，諗起一 D 野，喊左出黎，係咪又嚇親你呢？又係你面前喊，真係好冇用，同埋又要你擔心，我真係唔想，你問我做咩事喊，因為我諗番起以前一 D 野，同埋諗起依家既情況，好多好多回憶，好多好多感覺，好多野突然之間湧晒出黎，你叫我唔好諗咁多，但係有時真係唔到自己唔去諗，有 D 野我都想有方法可以去逃避，但係越係唔諗，個人就越係放唔低，有好多野我都想講，但係唔知點講，我知你想同我分擔，但係有 D 野真係要靠我自己去解決，有時自己諗唔通就係諗唔通，講俾一百個人知都冇用，分手之後幾個月內所發生既事令我好攰，有 D 野講左好多好多次，到依家有個答案，但係原來唔係真係咩都放得低，今日我竟然仲問自己，我係咪真係己經可以 READY 去投入一段新感情，可能我真係未準備好，我只知道我想對你好，我講過依家好難再毫無顧慮咁去愛一個人，人大左，諗野亦都複雜左，可能一直都只係我自己既問題！