本來由上個星期開始，諗住日日都寫日記，但係尋日返到屋企實在太攰，所以偷懶左一日，所以今日首先寫番尋日發生過 D 咩事先！

尋日返工好平淡，但係食晏時又落大雨，所以又係去左對面間服務態度勁差既台灣野食飯，食完飯返到公司仲好早，可以睇一陣書，好野，終於睇左三分一喇！陳慧蘭無啦啦話要同我換椅，古古怪怪，但係想話你知你原本坐開那張一 D 都唔好坐呀！問米婆話我地個部門可能會搬去筲箕灣喎，嘩！好遠呀！咪要好早起身？！

臨放工 RAYMOND 打黎問我得唔得閒食晚飯，之後約左佢七點零鐘係銅鑼灣等，放工就返屋企沖完涼再出去，返到屋企同 TOMMY 傾左一陣電話，你講晒你要講既野，其實星期一晚聽完你咁講，初初係好嬲，跟住反而係失望，一路問自己點解你會咁諗我，唔通我做得仲未夠好？！呢個幾月唔通我俾你既感覺就係咁？！我以為你會明白我，了解我，但係你令我知道你唔係，跟住唔想同你講，實在唔想好似以前咁拎住個電話個幾兩個鐘，然後大家隔幾分鐘先講一句野，根本唔係解決問題既方法，但係其實之後我都冇將呢件事放係心度，唔係話我唔著緊你，我都講過，我宜家唔會咩都咁放上心度架喇，但唔代表我做人唔認真囉！

跟住大約六點九出去銅鑼灣，點知上左車你個死人頭先話俾我知你仲係西貢等緊小巴，如果係以前既我，我一定鏟你鏟到上天花版，但係我冇，所以你好好彩架喇，我一個人企係世貿 ESPRIT 門口呆企半粒鐘有多，應該話係呆等，你又話架小巴會經世貿，點知你又打黎話架小巴行左去大坑度，我都費鬼事理你，等你自己行番過黎搵我，點知你一黎度就話我肥左，又話我水桶腰，又話我個頭唔得，又話件衫好 CAM，隻色又唔好睇！想點呀，出黎俾你評頭品足呀？？？由頭彈到落尾！！！跟住你帶左我去食印尼野，d waiters 都幾得丫，阿 Mars 都唔算呃你呀！D 野食 OK 丫，個環境幾好，可以傾到偈，原來差唔多成個月冇見你喇，你黑左咪幾好睇，冇以前咁殘，成個泰仔咁，哈，但係你又食番煙喇，唉，食少 D 啦！同你都仲傾到偈喎，幾好，係你面前我都冇咩唔講得，連肚痾咁核突既野都係食飯時講，對你我真係冇咩形象可言！呢次食飯仲破戒食左牛同蝦，好在 D 皮膚冇太痕！十點幾就走喇，冇諗到你真係請我食呢餐，我都係講下架咋，多謝你，下次輪到我請你啦！仲有，你下次記住做得安全 D 先得架，唔好做完先擔心呀，你都唔好咁擔心喇！

好，到今日喇！今日返工超眼訓，成日都聽到 0199 加 0082 同埋 1467 把聲，好煩，宜家連 0082 同小燕有時都要用我個位，究竟咩事呀，究竟又係我部機裝左 d 咩呀？？？討厭！放左工去做 GYM，好少人喎．．．哈哈．．．跟住就返屋企，搭巴士時感覺好好！好舒服！食飯前訓左陣，食完飯又訓，諗住一路訓到聽日，但係要起身刷牙洗面，點知之後精神番，所以開機寫日記，我話我訓唔係特登呃你架！唔好亂諗野呀！

睇左兩個留言，第一個明白晒，我宜家都冇乜野，我知你對我係點，我都希望你認同我對你做既野！第二個留言呢！知道你睇左醫生，正在康復中，咁就好喇，冇打俾你既原因係我尋日係街，同埋我唔想用咁多手提電話，因為呢排一傾得耐手提電話，個頭就超痛，唔係藉口，係真架，所以先 send msg 俾你，好啦，係時候訓喇，各位朋友都要 take care 呀！