七月十四日，一個百感交集ge星期三，亦係中一級結業禮。

同時間，今日都算係我今年最眼淺、最黑仔ge一日啦！

講番今朝，由於我地尋日仲有啲「手尾」未執，

所以就同大家約左7:30係吉之島間麥當勞等，食早餐之餘，再做下野。

好不幸地，係我等緊車果陣時，我先發現唔記得帶銀包，

結果要用多成八分鐘返屋企再去番搭車，唉！好低能。

去到間麥當勞，Sara、Ricky同Phoebe已經到左啦，所以我地就先開工！

嘩！原來朝早呢個時間ge麥當勞又冇人，再播住啲勁好聽ge歌，正呀！

但係整整下，發現有少少突發情況，份禮物個邊位原來有少少問題，

只可惜時間無多，再唔執野返學校，就遲到架啦！

結果我地四個，再加上Carmen，Jojo同Crystal七支箭咁衝左返去。

返到學校，集左隊之後，就分批去到禮堂，參與年度頒獎典禮。

話說第一個程序就係校長致詞，當中講到下年唔再教ge老師，

其中一位就係我地好尊敬而教左廿二年ge科學老師Mr. Lam，

我一聽到，真係以為自己聽錯姐，點知校長致詞之後，Mr. Lam走左上台，

講左段說話，然而佢仍然按住自己個Style咁加插左好多笑位，令到禮堂充滿哂笑聲，

但同時亦都有啲好失望ge聲音，佢仲講左好多好多ge說話，不過我已經唔記得哂啦，

因為果陣時我已經冇理佢講咩野，而眼入面已經積聚左一定ge眼水，

Mr. Lam臨落台前，仲為我地獻唱出最後一首歌唱──TODAY，好好聽呀！

我唔明點解，我已經咩野都唔唸，淨係聽Mr. Lam唱歌，啲眼淚會不禁咁流出，

直到佢唱完ge時候，我真係喊得幾厲害（我唔係誇張架），啲眼淚仲係我塊臉道。

唔知點解，佢只不過教左我一年姐，時間咁短暫，點解會喊到咁……

不過算啦！唯有祝佢係另一個里程碑上大放異彩啦。

之後，我都好似呆呆地咁樣坐係道。頒獎典禮完左之後，就返到課室，

呢一段時間，Miss Ip派左啲蠟蠟雜雜ge野比我地，包括考試試卷。

而派成績表個過程不詳，而成年拉混就考廿四，對我黎講就唔錯啦！

跟住Miss Ip再為我地成班每一個人簡左啲唔同ge書簽，

真係好有心呀，Miss Ip！多謝哂。而我果張係 “Light up yourself”。

去到臨放學之前，今年最後一句同Miss Ip講ge “Good Bye”係好齊，

而今日特別眼淺ge我係講呢句果陣又唔知點解有啲眼淚想湧出黎，

唉！如果下年係Miss Ip做班主任，你話幾好呢？

放左學之後，係課室道留左一陣間，執埋啲長做長有ge手尾。

跟住整整下就用ABBA個分班格式去計自己下年咩班，

結果係有一大班同學都係A班呀。之後就先拉大隊去搵啲科任老師，

佢地個個見到張卡之後，都好開心，不停咁話「多謝哂我地」！

真係好有滿足感呀，有人肯定左我地ge心思呀。

我地仲同每個老師影左啲相添呀，簡直開心到彈起。

當我地比左張卡Mr. Lam果陣時，佢話我地效率好高，多謝我地，

話全靠Miss Ip教導有方，最重要ge就講左「教我地1A綜合科學科好開心」！

呢個時候，我真係好心酸呀，好唔捨得佢呀！

一心唸住下年2A會係佢教，點知會變出人ge結果。

送比黃老師果陣時，唔知點解佢無啦啦講話佢下年做2B班主任，

而我就出於好奇心咁問佢：「咁樣2A邊個做呀？」

黃老師講完之後，死寂一片，我真係冇野好講，唯有聽天由命，順其之然，求主保佑。

去到最大份果個拼圖啦，就係送比班主任Miss Ip啦，

佢見到之後係好驚奇呀，仲話會攞返屋企慢慢砌添呀，Out Of Expectations！

離開左學校之後，就一大班同學去太古食晏咒果餐，

係吉之島等Phoebe簡野飲等左成十幾分鐘，真係好野！

最後我地就去左Food Court果道食野。

由於我見到好多人攞住個石頭黑椒牛肉鍋飯，再加上好香，

所以我，Carmen，Phoebe同Jacky分別叫左三個黑椒牛肉同一個三文魚飯。

真係好好食呀，所以好快就將啲飯灌哂落個胃道啦！

之後就傾左好耐計，無所不談，但係唔知點解講講下走去講箍牙。

結果就三點到先係Food Court道走，各散東西啦！