七月一日，香港回歸紀念日，

由於尋晚又四點半先至訓，所以呢日就兩點幾先起身，哈哈！

晏咒就終於買左對羽毛球鞋啦，好開心喔！

唯一唔太好ge就係：因為前一日做完「青蛙跳」加劇烈運動，

所以我呢一日隻腳係痛到爆，落樓梯腳痛；坐低果剎那斷腳……

七月二日，係中學ge歌唱比賽，雖然唔關我事，但都要返去做聽眾。

而我地班ge利同學過五關斬六將咁入左八强，都值得為他而慶祝一下。

但係好可惜，佢臨場失準，唱啲音斷斷續續，結果無緣四强。

不過唔緊要啦，下年捲土重來。繼續支持！

至於其他男參賽者就好木獨，走音，所以入到四强果啲都係女同學，

而指定歌曲就係Greatest Love of all，一首超級好聽ge英文歌。

同時間，果四位唱得都好好，只有其中一位將首歌個key較低個八度，哈哈！

頒獎之前，班評判要退席計分，於是就搵左教我地科學個Mr. Lam上台展示歌喉，

嘩，佢唱得真係好好聽呀，我地仲不停叫encore添，

唱得咁有感情同咁正ge佢點解冇得做今次比賽ge評審呢？

至於最後個比賽結果同我預期差唔多啦，恭喜恭喜。

放左學之後，就一枝箭咁返左小學，因為蔡老師請食pizza呀，

而我就食左兩隻雞翼、細半碟麪同一塊至尊，都幾飽咁啦！

食完之後就搵Miss Sarah同Miss Lo傾再陣，傾咩就不詳。

最後，兩點幾到就返左屋企啦！

去到夜晚，就再次落左婆婆屋企睇波，超級大戰呀，巴西對荷蘭喎！

雖然巴西一開始領先住一球，但係個球證又盲、又智障、又廢，

犯規又睇唔到，又唔吹，搞到巴西班球員鬼咁慶，

結果就爆大冷輸二比一。唔係掛，捧咩輸咩？係咪咁邪呀！

我就唔信四強烏拉圭嬴荷蘭，哈哈！最後，搞到兩點先訓……

選自：http://hk.myblog.yahoo.com/yatcheung_1997/article?mid=4344