十一月廿七日，朝早同媽咪爸爸去左葵芳會合左姑媽之後，

就同埋兩個年滿七歲同一歲既表外甥去左圓玄學院拜伯父。

伯父已經離開左三年啦，我記得果一日放左學之後爸爸打比我，

我聽到之後竟然喊得好犀利，雖然唔係成日見到伯父，但係佢都好鍚我！

呢次我就要幫手去執頭執尾啦，起碼要幫手擺下祭品，

之後食左少少野之後就上左姑媽屋企，同兩個表外甥玩下。

夜晚就慣性咁去左婆婆屋企食飯，因為某啲唔開心既原因，食完飯就返左屋企啦！

過左一陣，舅父兩個都上左黎，睇完套義海豪情之後就開檯打牌。

呢日我幫媽咪打左四鋪，好幸運咁食左三鋪糊，另外果鋪就叫糊架啦-v-

最重要既就係我第一鋪食左廿番；第二鋪就食十番，

最尾果一鋪就好創舉性咁食左鋪勁野：五十二番既十六不搭，哇，強呀！

話說呢日隻手好聽話，要乜有乜。唔洗再做敗家仔啦，哈哈！

不過有句說話好重要：輸錢皆因贏錢起，嘻嘻。

訓果陣時都差唔多成兩點啦，哇哈哈！

十一月廿八日，朝早起左身之後就再JOIN埋舅父佢地去中環碼頭，往長洲進發！

話說連續喊左兩日既我今日已經冇晒事啦，仲幾開心添。

去到碼頭因為見到下架普通船要等成四十五分鐘，

所以我地五個最後就比左雙倍既價錢去搭架特快船。

三十五分鐘之後就抵達啦，諗番起自己好耐冇黎，至少三年。

而呢一日黎既目的只有一個：冇錯！就係食野啦。

一開始就食左件「格仔餅」同「魚型紅豆餅」，唔錯唔錯。

點知呢個時候，細舅父隻手被啲雀屎污染左，哈哈！

跟住我地行過一間麪包店，爸爸叫到佢既至愛──忌廉筒。

佢先比我食左一啖，之後到佢食，跟住我又搶住要，

點知……我一啖食晒啲CREAM，佢手上得番個筒，簡直食死我喔。

我地穿過著啲橫街，見到好多「無離頭」既鋪頭，

其中有一間買啲超級迷你版既老夫子漫畫，

彩色印刷架，啲字都睇得幾清楚（同我果啲差唔多），實在太可愛啦。

行番去個廣場道，買左幾串炸豆腐卜同埋炸魚蛋黎食，

雖然啲豆腐卜炸得冇咩味，但勝在夠脆；而魚蛋既表皮炸過就好好味！

食完呢幾樣野再行前幾步，又買左樣叫蘿蔔池，呢樣更好味。

其實蘿蔔池既歷史好長，一堆堆既蘿蔔絲新鮮滾熱辣炸完之後，好香架。

之後行去長洲東灣沙灘（個名差唔多啦）途中就停左係間好出名既鋪前面，

買左兩串冰涷水果棒同埋一條薯圈，跟住就將啲秘製調味料灑落啲薯圈道。

薯圈已經唔太脆；最好味既調味料就係紫菜；至於水果棒都可以啦。

係沙灘影左幾張相之後就經過「自殺聖地」──東堤小築，最後行到去長洲既另一邊。

最後我地就搵左間自稱好耐歷史同埋馳名既「魚蛋粉」店食正餐啦。

我就食左個墨丸牛腩河粉。坦白講，我情願食番西灣河果間，因為個質素差唔多……

臨上船之前就再食左串炸魚蛋，嘻嘻！好似食勁都唔飽咁樣xD

返到屋企都六點幾啦，呢晚我地五個就打邊爐，仍然食左好多野，太開心啦。

話說我唔開心既事候，食番一堆我鍾意食既野就可以調整番架啦，嘻嘻！

呢日夜晚就好好訓，始終連續幾日都好早起身，好耶。