| «‹ May 2015 ›» | | S | M | T | W | T | F | S | | | | | | 1 | 2 | | 3 | 4 | 5 | 6 | 7 | 8 | 9 | | 10 | 11 | 12 | 13 | 14 | 15 | 16 | | 17 | 18 | 19 | 20 | 21 | 22 | 23 | | 24 | 25 | 26 | 27 | 28 | 29 | 30 | | 31 | |
|
2014 年 2 月 5 日 星期三  |
| 黑暗中對話 |
分類: 章の生活日誌 |
一月廿六日。晏咒成班學校ECA LEADERS去左美孚個黑暗中對話:$ 我成日將DIALOGUE IN THE DARK個DIALOGUE變左做TALKING...搞到個檔次好似低晒咁:O 最初分組都擾攘左好耐，最後同RICKY`DZYN`SAMSON`CANDY`KAREN同MRS.LAM一組:$ 正當我地成組等緊開始黑暗既旅程都學識點樣打啲凸字，中心既職員仲比左塊特製既模板同埋類似枝針既野我督，督到個字果刻好有成功感XD.
進入左個活動空間之後，工作人員先教我地點樣使用盲公杖，我果刻唸如果將佢當做金剛棒實會掃低晒身邊既人，之後導賞員阿BREAD帶我地展開奇妙既旅程。我地吾止經過左個公園、吊橋、有床褥同電腦既睡房，仲會行過條馬路，慢幾步都會比架車咇添架。正正因為我地係呢個空間伸手不見五指 更加需要靠其餘既聽覺、嗅覺同觸覺，有時會聞到草香味；聽到流水聲同雀鳥既叫聲；或者摸到痰罐同鮑魚刷。呢一切都係我地日常生活接觸到既事物，但往往急促既生活節奏令到我地忽略身邊既細節。
有個部分我地成組人進入左個音樂廳，先要靠自己既感官揾張櫈坐低，再靜心欣賞七分鐘既音樂。起初我以為七分鐘好漫長，或者對於個工作排得滿滿既人來說，七分鐘可以改變好多，至少七分鐘我應該可以打到五百個以上中文字。難得呢七分鐘容許我將所有既思緒暫且擱置 享受音樂，原來真係好平靜、好舒服。呢個活動既意義遠超於讓我地體會到視障人仕既生活，更係教曉我地學會享受生活，留意平時既瑣碎而美好既事情。
除左摸黑摺衫之外，仲可以嘗試摸黑用散銀買小食，而我就買左盒暖既維他奶，仲食左鐫啲OREO同MRS.LAM既薑糖。呢七十五分鐘過得好快，或者習慣左吾用視覺就無晒所謂既時間觀念。當我地坐係小食部聽阿BREAD講野既時候萬萬也想像吾到佢係一位完全失明既人士，佢純粹憑感覺、憑經驗帶領我地七個穿梭各個展區。我的確深感佩服，縱使佢有缺陷、縱使佢面對既困難有幾大，佢既才能絕不比我地遜色。能夠一個人四出遊走，探索新既地方；能夠參加香港唯一一支盲人足球隊，單靠特製皮球既聲響作定位；能夠自己揀衫煮飯，從來都吾係一個負累。
我唸番起印象最難忘既一個場景。當時我地成組處於一個街市攤檔，阿BREAD叫我地揾吾同食物，比如合掌瓜、薯仔、薑、螺絲粉、豆豉零魚、罐頭粟米湯、午餐肉、沙田柚、蘋果、合桃等。揾到就出聲同等佢埋黎遞比佢，佢只係憑氣流就知道我地企係邊，摸兩摸就知道我地有冇揀錯，方向感比我地健全既人好得多，的確好犀利。黑暗中對話，好深刻既體會， 觸動人心既分享，領略到既比預期還要多。離開前仲同阿BREAD影左張大合照，仲以握手作為答謝同道別，為呢個與別不同既下午劃上完美句號。
過多日係羽毛球兩日一夜既訓練營喇，祈求天公造美，唔落雨玩得盡興:D 我覺得廿幾個人攞住塊羽毛球拍同TEAM衫去會好好笑^0^ 記得上年呢個時候我地成班去左石澳燒野食，都幾瘋狂:P 希望果兩日既活動精彩啦*V*
|
|
