| «‹ May 2015 ›» | | S | M | T | W | T | F | S | | | | | | 1 | 2 | | 3 | 4 | 5 | 6 | 7 | 8 | 9 | | 10 | 11 | 12 | 13 | 14 | 15 | 16 | | 17 | 18 | 19 | 20 | 21 | 22 | 23 | | 24 | 25 | 26 | 27 | 28 | 29 | 30 | | 31 | |
|
2014 年 5 月 10 日 星期六  |
| 信念 |
分類: 章の生活日誌 |
鋼琴ATCL張報名表格終於遞交左，計時器開始倒數，距離十月、十一月考試其實數埋都係剩番半年都無LOL呢排上堂都唔知自己啲手指做咩咁唔乖巧，偏係作對咁...記得有日上堂我彈左幾行就比個老師停左...
「手指好唔靈活。裝飾音彈得唔清楚。你有無聽我講返屋企放慢練？我知你平時好努力練琴，但宜家唔彈番慢只會害左你，最後就係死路一條。」
結果餘下時間都係逐句逐句練，只想呢堂可以快啲結束。淚水能夠強忍係眼眶，直至離開先至落下已經好堅強，好耐未試過因為彈琴既表現唔好而落淚，但有時真係好無奈，自問我係屋企練果時唔係咁樣，至少啲手指係聽話既，只係去到上堂唔知緊張定係點樣始終都表現得唔好，就係因為老師連續幾星期既彈劾，我每次練琴花上個幾鐘，每次都會彈到兩隻手都有啲酸痛感覺，絕無誇張成分......有時我會好傻咁諗，彈琴興趣黎咋嘛，彈到咁辛苦為咩？但諗深一層，呢條路係自己選擇既，無得怨更加唔應該怨。目前對自己既要求好簡單，純粹想見到自己可以進步番咋@@
「當你想放棄的時候，想一想你是如何開始的。」
「當你想放棄的時候，想一想是什麼支撐著你一路堅持。」
其實我好鍾意睇番之前自己影過既相，因為啲相對於勾起記憶真係好有幫助，話說四月加加埋埋過五百張相，睇番就會好開心-V-
四月五日。我地一家三口同埋公公婆婆佢地報名參加啲香港一日遊啦，公公行動不便所以好少機會周圍遊走，難得呢日放晴出去呼吸新鮮空氣都未嘗唔係一件好事，成班人咁樣「出巡」真係幾熱鬧架，始終結伴旅行係最好既-V- 雖然呢日遊覽啲景點唔算有啲咩過人既特色，但平時你有幾可會去摘士多啤利先:P 話說新建成果個郵輪碼頭平台個花園都好大，好多角落都好適合影相，仲可以將成個維港盡收眼底:$ 值得一提就係晏咒係鯉魚門食果餐好豐富，條斑同埋啲海鮮都好好味<3
四月二日。師生羽毛球比賽，亦係我加入校隊四年既最後一次同老師切磋既機會。以往每年師生賽都係同盧諾晞夾，RONNIE倒係一個新嘗試，短小精幹既我加身型寵大既佢拼埋一齊有啲相映成趣既感覺囉:$ 能夠同校長加MR.HUNG對戰其實好難得，同時好興奮係因為成場比賽將會有好多意想不到既挑戰-V- 我同RONNIE其實都係勝在短時間進入狀態，開賽食住個勢之餘都打得幾順利，有幾球仲係雙方來回猜左好多板。雖然企係場內要兼顧接球，但同時都會感受到有精彩既氣氛（唉病句嘛-_- 但這不是重點吧..）:P中段有啲不必意既失誤，但最後勝出比賽已經無悔:D 曾幾何時我唔明點解啲師兄升到中五就開始「潛水」，我果時仲好天真咁同自己講第時唔可以咁，唔可以做壞個風氣...但後黎讀書壓力愈大，就會自自然然忽略練波，或者將果啲時間犧牲做其他工作。儘管有時放學得閒都情願返屋企休息下......究竟原因何在？相隔幾個月執起球板跳殺，落波雖然無咁得心應手，但我真係好享受係場上走動果種感覺。「身不由己」或者只係一個令到自己能夠暫時心安理得既藉口黎。
無論係彈琴，抑或打羽毛球，都應該要有信念支持既。
|
|
|
Always support. Enjoy everything you are working hard on. That might help you do better :)
|
網主回覆
thanks so much carol T^T
i will try to think in another way!!
and hope everything will turn better^^ Posted at 2014-06-22 07:42 PM [ 編輯 ] [ 刪除 ] |
|
