中秋節快樂！升到上中六儘管只係九月都過住啲好CHUR既生活，今年既中秋節更以往更加平靜，好早就做完節返左屋企。老實講，我心底裏的確有啲心思思想同成家人食飽飯後搵班FRIENDS去玩既，但唔知係咪「習慣成自然」左覺得就算無都無所謂？有時候我都唔太理解點解爸爸到呢個歲數都唔放心我出太夜街，自問我都唔係果啲無交帶既人，況且都唔會好離譜，識得一點前左右返屋企既haha. 好記得細個每年屋企人就會打麻雀打到通宵達旦，而我就會一手拖住燈籠，另一手就拖住爸爸咁樣係鰂魚涌公園散步。果啲時間印象真係好深刻，因為由細到大我都係跟媽咪多啲，難得中秋晚上兩父子係海旁好CLOSE咁傾計<3 剛才返屋企途中，每經過公園或者空地都會見到好多小朋友，望住佢地身上穿戴著啲螢光棒就會諗番以往既樂趣，但人大左感覺好似隨之變得淡薄？我好鍾意果啲白色既兔仔燈籠架，希望下年有機會重拾呢童真，能夠拖住呢隻野係公園暢遊下。
有啲唔捨得《載得有情人》大結局左，唔知點解人愈大對於呢類型溫情小品感興趣啲，雖然當中都有啲勾心鬥角既情節，但係黎耀祥同埋蘇玉華比人個感覺好舒服，好鍾意呢套題材咁特別既劇集，每晚做完我都好似意猶未盡。呢十幾年黎時裝片睇唔少，但上面果套同《使徒行者》重新勾起我追無視劇集既習慣，真係好鍾意佘詩曼同梁烈唯果兩個角色，好耐未試過一家三口坐定定咁笑住睇劇。或者係我睇親電視劇就會好投入，成日都會不自覺咁樣諗究竟果五個臥底係邊幾個。
突然變左做電視蟲，但都識得放番多啲時間溫書。月尾開始又係無休止既NON TEST DAY TESTS，希望到時平常心面對，唔好成個緊張大師咁（但根據以往經驗有八成都係臨急抱佛腳），但我宜家有個習慣就係出親街都帶定本PASTPAPERS，溫書之餘順便清CONCEPT，咁樣至少唔會咁易訓教，我好討厭自己開親書就會先打喊爐，半個鐘內就會趴左係檯面。話說尋日晏咒本想開工備戰既，但最後坐坐下係梳化，愈坐就愈攰，訓醒發現時間驚過個半鐘真係有啲罪惡感。
中六開始左一個星期，距離DSE考試既日子得番二百日左右，除左「逼在眉睫」都唔知可以點樣形容。唔知由幾時開始我覺得返學真正學到野既只有BIO同ECON堂，題外話今日BIO堂劏豬腎好簡單，但無咩STRUCTURE可以EXAMINE咁樣。其餘時間基本上同訓教自修無分別，當然每每就最期待A5 LUNCHTIME後既P.E.堂。天氣的確好焗促，但難得可以出身汗，同埋MR.HUNG一齊打排球係開心既！我記得上年開學第一日講過自己中一時候既糗事，只不過核特得黎好有紀念價值，頭兩日HOME PERIOD都無咩特別，最癲就係我地成班同學要係上年501班房搬番堆雜物同佈置落106呢間新房，之後好似垃圾佬咁不停DUMP...但慶幸兩日之內我地將呢間課室搞到好似開PARTY咁，每個角落都有好歡樂既氣氛，除左貼番上年MARVEL既作品之外仲有好多五顏六色既氣球，我諗無論老師定其他班同學入到黎都會有種好羨慕既感覺姐。雖然呢間房又細又凍又舊，但逼得黎先顯得我地親密:$
呢段真係純粹自己有感而發，原來五年時光就係好快過，中一開蜜月時光、中二既長洲宿營、中三果套係YOUTUBE好多點擊人數既短片、中四既CLASS CONCERT等等都歷歷在目，距離自己只不過係幾個月既時咁樣。有時候我睇番以前既相，睇番以前收到既信件或者聖誕卡會好有衝勁做好自己，同時會不自覺咁樣諗番好多好多片段。我覺得自己好感性，同樣對好既事情往往唔捨得放手，我到宜家偶爾都會諗SPORTS DAY同SPEECH DAY要同邊個影相，會諗自己LAST TEACHING DAY又會咩心情......五年前既我，坐係一樓盡頭而且充滿笑聲既課室裏面，望住比自己更高樓層既師兄師姐會覺得好犀利；四年前既我，三年前既我，慢慢咁樣由一樓課室走到上五樓，由從前係一樓仰望天空既自己，演變成個從五樓俯瞰番下面果批天真、爛玩既新生，作為「學長」既我間唔中都會有種「大地在我腳下」既感覺浮現出黎...直到今年，就好似個循環咁樣，呢種感覺好微妙，但我就係唔識得形容。
|
