我真係好唔享受過呢啲生活，我真係好想周圍發掘香港一啲得意既野，我真係好想去海洋公園果度嚇番餐，我真係唔鍾意自己呢段日子太過情緒化，好容易就會有啲鬱悶頹廢既感覺，眼見自己張CHECKLIST做極都唔完，清完呢樣又有新野加就感覺好無助。不過呢排多左係圖書館溫書，上星期日我仲一個人無無聊聊咁沿住北角海旁，係個寵物公園度溫書添，最後繼續慢慢行番西灣河。或者街外溫書比較適合自己，每次坐係書檯開住本PASTPAPER或者TEXTBOOK，不消一會就會沉不住氣，昏昏欲睡。
話說《使徒行者》結局篇，印象中我真係好少係BLOG提劇集，感覺就係好毒咁樣:O 但晚晚就算幾忙都好都總會抽一個鐘睇，雖然歡喜哥同阿釘唔係親生父女，但果種關係真係好煽情，呢幾集愈黎愈多無辜既人被殺，好慘情，完完全全牽動自己既情緒走。第五個臥底有啲時候雖然係身不由己，但也未必太過絕情...好啦，講夠喇，我都係時候要抽離下啲劇情，唔可以再咁投入haha.
佔中罷課，全城熱話。老實講我覺得自己有啲政治冷感既...雖然大概知道發生咩事，但從來都唔會點樣深思，不過有啲唔理解就係點解黃之鋒比人控告非法集結、強行闖入政府建築物之後會受到咁無理既對待，連去廁所都有警員跟住，六十呎既屋都比人反轉......
心裏儘管不想，但返學的確係每日既指定動作，另一個指定動作係懶床，結果最近兩度衝番學校，感覺唔係幾好受。宜家最愛就係上MUSIC、ART同埋PE。雖然上音樂堂好似好雞，仲要唱校歌，但果種感覺真係好輕鬆；雖然ART堂坐前排既我會受到老師既聽覺折磨，啲ARTWORK仲有啲無聊，但有時溫書溫到悶用泥畫畫就最好不過。或者我真係強逼症，核特極都有個譜haha. PE堂就更加不用說啦，一日連續八堂打排球我都別無怨言...但現實只係兩個星期先得一堂咁大把T^T
其實呢篇重點不在於此，但我想趁住自己感受仲幾深既時候寫左先。
九月十八日，對於我黎講何其重要。一年一度既班際排球比賽正式展開，首輪賽事由我地6B硬撼6E，不多說了，廿分鐘內比人直落連贏兩局，首輪出局被秒殺而徹底敗北。哨子聲響起，結束呢場賽事，沒頭沒腦手都無握就直衝更衣室洗臉冷靜。隨後既兩堂LS堂成個班房都死寂一片，而我既心情亦都好複雜，似乎仲未接受到呢個事實？不過夜啲返緊屋企既時候坐係公園傾左差唔多成個鐘電話，某程度上都將自己不快既情緒宣洩出黎，至少無先前咁鑽牛角尖......
早啲個星期日，我地班九位代表都有去練波，即使兩邊都未能夠組成正統既六人大軍，但每個人都揮灑汗水好比心機打，就連PHOEBE打完都搞到自己右手受傷，說是筋膜炎？結果，正式比賽當天佢只能坐係替補既長櫈為場上既我地擔憂。當初我知道佢無辦法出賽果時真係好失望，果種落差我都唔識點樣形容，就係一件「不可能的事發生了」咁樣。果日練習我出乎意料地狀態大勇，大部分既接發都好靚咁傳到比SETTER，即使係網前都可以SET到有質素既波比STRIKER，就連開波都接近百發百中。只可惜，站係場中間面對敵人，背負住心理壓力既時候竟然不斷犯錯...當我第一次發波果時發現自己個波拋得唔直，轟左出界果時我已經好不忿咁樣另轉頭暗暗講左句粗口，原本得以重任既我辜負左RAYMOND本先既期望，對不起。
班際比賽對我黎講有幾重要？我諗番初中四年，如果係羽毛球、籃球比賽或者唔會有呢份執著，可能自知技不如人，但正正因為係排球比賽，我地班有優勢、得到其他人既期望同支持先有呢份咁強，某程度上都係過分左既爭勝心。班與班之間既榮辱看得太重，特別係同級既兩班，實力本先勢均力敵，但我地兩局都係輸自己，無信心、無溝通、無士氣，第一局半場落後幾分就開始一蹶不振咁樣，連6B都懶得嗌出黎。我將比賽既勝負完完全全凌駕於一切，我地班同學的確差唔多準時到齊支持，有啲來回波的確打得幾精彩同驚險，之前練波果時刻的確係開心既，但果刻，甚至呢刻我都覺得：呢場比賽輸左，果一切都變得不重要。
心態上既以為，以為會贏，以為能夠出線，以為最後能夠同6D班問鼎冠軍，結果統統不是。開波之前聽到太多人既鼓勵，我好想將呢場比賽打得穩陣，但原來自己既心理質素根本就負荷唔到，打唔到本身有既水準。回想番一年前我地首場對決又係對纏擾既6C奇蹟地先取一局，不過最終都係落敗收場。但我好記得呢兩年既分別，上次大家自知對方利害，唔敢有過多既奢望，所以抱住平常心打就組織到好多令人欣賞既攻擊，就連MR.HUNG賽後都讚我地打得好，但今年呢？天堂與地獄之別。
落敗以後，收到既係更多安慰既說話。老實講，有啲時候真係唔係好想聽到，當然我知道原意係好既，但果陣書見到只係一陣心酸既感覺。我唔係好識得去形容，只係唔想將同一番既說話向唔同人重覆，唯有以THANKS ANYWAY輕輕帶過。我失敗過，我明白自己輸左比賽都會有唔開心既時候，更加明白過去左既事就唔應該不停諗番轉頭，所以我知道自己需要時間調整。或者呢啲時候，「勿擾」就適合不過。呢幾日返學都有排球比賽，每次我都會刻意提醒自己唔會將自己班既情況代入去，提醒自己唔好走番去死胡同到，但偶爾都會聽到自己同班同學好唔服氣咁樣走過黎無意同我講：「JUSTIN!! 我覺得我地上星期輸得好唔抵囉！如果我地對呢班既話...肯定唔知點點點...」每次我既回應都係：「夠喇，唔好再講喇。」我唔想自己又再比果日既事影響到心情，每次諗到都不好受。
最後，我好想講另一場中六級既對決。某班自知對手陣中粒粒皆是「球星」就信心欠奉，但某一靈魂人物係WHATSAPP GROUP果度打左段野互相鼓勵，仲話無論贏輸都好，都希望班上每位正選同後備都有份出賽，賽後可以齊齊整整影張相。呢種豁達既心態反而令到呢班發揮得異常好，即使隊友打失波，果位靈魂人物都放低以往果種慣於係場中「開口大罵」既行徑，竟然上前拍拍佢隻手，完完全全起到種激勵既作用。呢種團結既精神反而令到佢地追平一局，決勝局只係以幾分之差落敗於對方呢對種籽球隊，情況就好似睇番上年我地5B對6C咁樣。完場後我地成班人企係走廊，望住呢班雖敗猶榮既隊伍係操場中果個震奮而且滿足既心情，就會忍唔住有種心酸既感覺。想不到第一輪就出局，唉原來到今時今刻我仲未完全放得低，或者我應該好好向呢班同學學習。
正如RAYMOND之前既一句說話：「六年後未曾係班際比賽晉級過。」
細心想想，原來，我都係。
|
