雖然天氣已經慢慢回暖，但好似我呢D鐘意打邊邊既小朋友，係咩時候都可以烚下烚下的：）

講到烚下烚下，一定不能少既就係肥牛啦!!!

但今次食得更豪，我地用和牛打邊邊!!!當堂個氣勢都出哂黎呀>v<

記得門口隻牛牛，好搶眼XD

坐既位好似一個個浴缸咁，情侶一齊食成件事就變得好Sweet >////<

雖然都幾搞笑，但其實幾有私人空間，成班朋友細聲講，大聲笑都沒問題。

我地今次一大班決定豪食最最最頂級既日本飛驒和牛放題。

人多我地揀足4個湯底黎試XD

蕃茄濃湯：香濃好味，但碌牛就無乜牛味，妹仔大過主人婆XD但碌其他配料就冇得頂!

甜醬油湯：食牛必備的完美組合，用黎碌粉絲都好正架，但都幾濃味，粉絲食唔到太多。

昆布海鹽清湯：清清地，嗒落昆布味慢慢滲出黎，唔太搶食到個牛牛既鮮味。

黑蒜豬骨湯：重口味之選，頭一啖湯真係濃味到有少少苦，但食多幾轉之後，其實又幾有性格，不過真係唔好淨揀呢個湯底，唔係變哂蒜味牛架啦XD

等緊個湯底滾既時候就緊係去混定醬，拇定配料啦：）

醬料都幾多選擇，個醬油又真係唔錯，淡淡適中，加返少少蒜同辣椒，正!

就咁點七味粉都幾好架。

配料都幾多款兼吸引，麵都過埋冷河等你拎走，滾返熱就食得，仲有好多款無揀添。

仲有飯同刺身都係放題架。

我地都拎左唔少XD全部都試勻哂，估佢唔到既係...真係樣樣都唔差喎@口@

比較其他同類既放題，佢既配料係有返咁上下質素既呢，分分鐘係屋企自己打邊邊買既都唔夠佢好味。

不過個新出既油炸鬼就爭D啦，人地通常係油炸鬼連堆D釀料一齊炸。

佢地就炸完條油炸鬼先釀D餡料，滾到D餡熟既時候，油炸鬼已經淋到一Pat野了...真係要再搞搞佢啦...

講左咁耐，肥牛終於出場!!!

上面係日本飛驒和牛，下面係澳洲貴族和牛。

係呢間盛八最貴既兩款牛，日本和牛既雪花比較分佈平均，油脂比較多，食落係軟綿綿既口感，牛肉味十足。

而澳洲和牛就牛味濃D，脂肪少D但比較有咬口，個人Like呢隻多少少。

野飲方面是任飲的，選擇都幾多，仲有教埋你溝。

一般汽水之外，仲有包裝飲品，好似仲有啤酒添。

啫喱杯都幾吸引，手上係青檸同士多啤梨味，我好似一個人都食左3/4杯，細細杯唔覺唔覺XD

甜品我就不嬲唔太好，但見到呢個7層高既朱古力噴泉就已經無得輸，而其實隔離既綠茶朱古力同其他甜品賣相都幾吸引，但我已經食唔落啦XD

呢邊個價位比一般同類既相比係貴左少少，但整體食物質素就真係值回票價。

和牛雖然唔係頂級質素，但打邊邊黎計已經好完美了，再高級D既和牛用黎手邊邊就真係太浪費了。

不過又...食既時間又係得90分鐘，真係有少少唔夠，食到好鬼趕，其實打邊邊可唔可以唔好限時啊，又要烚、又要食，90分鐘真係分身不下，想吹多兩句都食唔切啊T^T