早前，參加 U Magazine 「甜牙牙夢幻甜品派對」，早咗一份迷你窩夫層層疊。
領獎地點係屯門 V City 甜牙牙分店。
噚日，即領獎大限到前，我飛撲去食埋呢份甜品。
甜牙牙屯門 V City 分店係於地下，扶手電梯後面。雖然地點隱蔽，但都容易搵。
門口位置相當寬闊，但長期都有人牆喺到，好難睇得到裏面環境。
想入去坐定定食嘢，我只好穿過人牆去搵職員拎飛仔。
等候期間，終於可以睇清楚屯門分店環境及裝修。
環境同尖沙咀店完全唔同，燈光暗沉，座位比較迫，但係氣氛卻異常和諧、開心。見到每檯顧客樂也融融迫埋一齊分享檯上美食，感覺好warm。
等咗10分鐘左右，我可以入去坐喇。
之前已幫襯過尖沙咀分店，已試過招牌甜品，所以今次只係想食中獎甜品：迷你窩夫層層疊。
坐低無耐，職員將餐具、如espresso般大小嘅水杯及單據放下。
眼利嘅我，一睇已經覺得餐具有d唔妥。睇清楚，見到刀叉都有d迹。用之前要抹一抹。
隔咗5分鐘左右，我嘅甜品到喇。
即刻嚟個 "相機先食" ，呵呵呵。。。
見到朱古力雪糕球，當然第一時間食咗佢先喇，別讓它流走。
食完後，將頂嗰支枝籤嚟落嚟。
可以睇枝籤頂部係油咗朱古力色，令枝籤同朱古力雪糕球更match，廚師明顯喺擺設上落過心思，令整個 look 變得更靚。
講明係窩夫層層疊，三層窩夫中間夾住不同生果。由頂數落去，第一層係士多啤梨，第二係哈蜜瓜。
每層有2件生果。
為令生果黏貼窩夫，會搽上少少cream，咁生果就唔會偷走。
一路食迷你窩夫層層疊，我已經感覺到食材夠晒新鮮，窩夫鬆軟度、cream甜度、生果新鮮度都比上次喺尖沙咀店好好多，甚至連伴碟嘅果仁碎粒都係鬆脆。
唔知係咪等候人客多，餐具唔夠用？
享受緊迷你窩夫層層疊期間，職員已問 "仲要唔要餐具？"，我擰頭後，職員即拎走剩餘餐具。
食完迷你窩夫層層疊後，我拎起水杯，逐啖逐啖喝水，清清喉嚨。
喝水期間，職員又以9秒9速度收起碟，睇嚟 "逐客令" 意思超強。我咪立即起行，讓出張可坐4人嘅小型方檯，唔阻人做生意。
今次食物質素真係唔錯，有一定水準。可惜，入舖前後不到15分鐘，就請我走，感覺真係有些 "不是味兒"！
|
