我好鍾意同朋友聚一聚，因為每次都可以食到唔同美食，又可以天南地北，任講任笑，歡渡一個下午/晚上。

今次，我就同幾位朋友嚟 IFC Greyhound Cafe 食特式嘅泰國菜。

IFC Greyhound Cafe 位置相當方便、就腳，喺人來人往嘅 Podium Level 1 中間近窗嘅舖位。日夜都可欣賞不同景色，感受不同氣氛。

IFC Greyhound Cafe 環境寬敞，座位都寬落，檯同檯之間嘅距離有返咁上下。哈，咁就唔使怕嘈親隔離檯。

一坐低，檯面已經放好晒所有餐具，只等顧客發板，好快就有嘢食lu。

由於我同朋友喺外邊趕過嚟，成身熱辣辣，即刻叫咗杯凍喝消消暑。

話都無詌快，龍眼特飲同番石榴特飲都送到嚟。

2杯飲品都好真材實料，尤其是番石榴特飲，啖啖果汁，消暑又醒胃。

我哋幾個女生早已聞風 Greyhound Cafe 甜品好食，仲設計得好吸引添，所以決定只係叫5款前菜、主菜，留返第二胃食甜品。

發板無耐，食品已經逐碟逐碟送上。

1. 芝士雜菜千層麵沙律 Fresh Lasagna Salad  HKD108

呢碟沙律賣相好靚，真係好似玩層層疊。

材料新鮮，配埋清淡沙律汁，令材料更加鮮甜。只係拎嘅時候比較麻煩，上層無可能切開，唯有逐層逐層拎；到下半層時，就可以將食物切開一半，同友人分享。

2. 鮮蝦帶子墨魚汁麵 Spaghetti Cha Cha Cha

賣相又係相當靚，海鮮彈牙爽口。不過，我比較少食墨魚汁麵，唔知道墨魚汁麵係有腥味，為咗減低腥味，所以加辣味平衡返，搞到我第一啖喺無預計底下，就中招。整體嚟講，除咗辣，真係一碟質量同質素好嘅意粉。

3. Grilled Angus Sirloin with North Eastern Thai Spicy Hot Sauce HKD208

唔記得中文名係咩喇，賣相一般。要問待應先至知食法。首先，食條青瓜清吓口腔，然後才食西冷牛。西冷牛已經切好一片片，拎一片後，可醮特製醬汁，或配糯米飯或雜菜一起食。

西冷牛睇得出廚師嘅功夫了得，可惜，食落覺得牛肉比較乾，食唔出牛肉鮮味及質感。

4. 軟殼蟹沙律配蜜糖芥末醬   Soft-Shell Crab Salad HKD128

賣相真係一般，但係睇得出廚師係用心擺設。

材料新鮮、醬汁特別，一試無妨。

5. 漢堡包

全名唔記得，只係想試吓店舖特色漢堡包，所以先點佢。點知靈魂漢堡失色，無牛肉味又唔夠肉汁，配埋上下兩層漢堡包，真係得個"乾"字。好睬有其他醬汁同配菜，咁先唔使乾食。

估唔到，只係5碟食物已經填滿我哋第一個胃。


嘻嘻，第二個胃已經ready！

大家每人都叫咗一個甜品，分別有朱古力香蕉千層蛋糕、雜莓千層蛋糕及Chocolate Lover。

每款甜品賣相都好吸引。大家已急不及待手起羮落，慢慢享受甜品。


呢個時候係全餐飯中最寧靜嘅時刻，每人都全心全意去品嚐，讓味蕾感受細滑、香甜。

食完甜品後，我哋每人唔止填滿第二個胃，仲充滿開心能量。Hehe，甜品果然係女性嘅恩物。

好開心，短短時間，大家食吓嘢，吹吓水，咁就開心、飽足回家。

真期待下次嘅聚會時間！

如想得到最新Greyhound Cafe資訊，可瀏覽
website: http://www.greyhoundcafe.com.hk/
facebook: https://www.facebook.com/GreyhoundCafeHK