多得同事提醒，我先至知29/5(星期五)有得免費搭叮叮同船。
臨食晏前靈機一動，決定搭叮叮去灣仔食拉麵。至於邊間，就視乎人龍而定。
手快腳快，極速上咗第一部電車，去到修頓球場嗰個站落車，行入汕頭街。
眼見整條街空空的，即是可以任選其中一間，於是去同事強列推薦嘅來自沖繩嘅"黑龍"拉麵。
好睬店內有4個空位，唔使等即係可以坐定定，揀心水拉麵。
店內裝修仿似日本拉麵店，大部分位都係圍住廚房，可以清楚睇到廚師煮麵，同埋將麵送到你面前。
我嘅位置可以睇到廚房兩位師傅嘅合拍度、認真度同埋手勢都係好好，すごいです。
位前面已經貼出店舖供應嘅食物，分別係黑龍豚骨拉麵、炭燒牛筋拉麵和牛筋BLACK沾麵3種款式。
仲有每日只限供應10碗黑龍叉燒飯。
一個ORDER紙已列出晒所有選擇。
原先我選每日限量供應嘅"叉燒飯"，不過聽到店內唯一一位講廣東話職員介紹後，我決定轉軚食"炭燒牛筋拉麵"。點解轉軚，除咗因為第一次試有牛嘅拉麵，仲有另一個原因，之後先講。
由於我早落單，所以我碗麵好快就上檯喇。
終於有一碗正宗日本拉麵出現喺我面前，真係開心到難以形容。(因為之前某幾間嘅經驗，真係差到難以形容)
第一吓，當然係喝返啖湯先喇。
嘩， おいしい （o i shi i）﹗個湯真係好濃稠，而且仲好夠熱添！
原來係店舖獨門湯底，以沖繩特產「Agu豬」的豬骨和豬手熬製，質感濃稠，而且骨膠原特別豐富。
下一步就試拉麵，拎起一注，知道係正宗日本拉麵，即係安心晒。(之前喺銅鑼灣拉麵站食埋D不知所謂嘅拉麵，麵嘅質感完全唔點。)
將拉麵沾上湯及油，然後一啖"殊"入口。
今次真係食得夠爽、正、開心，呢D先係日本拉麵嘛！
接住就食牛筋，都有4粒四四方方嘅牛筋粒。
牛筋炆得淋同入味，但就無中式牛筋嗰種漿口嘅感覺，同埋食唔出炭燒味，感覺都係一般。
呢碗麵另一驚喜係溏心蛋，坊間通常只俾半隻，但係呢到係整隻。
筷子將蛋一分為二，內裏流心蛋黃係咁流出，完全無熟咗嘅蛋黃，真係做到啱啱好！
我將蛋黃汁沾上麵條嚟食，真係正！
拉麵仲配上一塊叉燒，不過質素無上面講嘅材料咁好質素，唔夠味之餘，仲偏厚，失策。
咁嘅質素叉燒，即係令我覺得自己轉軚轉得啱，否則就食咗每日只限供應10碗嘅黑龍叉燒飯。
食到最後我剩餘咗濃濃嘅湯，唔通就咁喝咗佢，好似好寡。
其實我只係食咗上半場咋。之前職員推介我先食拉麵，留返少少湯，之後再加飯，變成湯飯，咁就成為我下半場，呢個就係我轉軚嘅原因，亦讓我體驗日本人的地道食法。
將一碗熱辣辣嘅秋田小町米做嘅飯，倒入已涼嘅濃湯，將兩者搞勻。
結果，唔止令湯熱返，仲可以令每粒飯都沾上濃湯，每匙飯都係熱辣辣同埋充滿濃濃嘅豬骨湯味，比起食韓式湯飯嗰種感覺更加強烈同有口感。
唔好睇少一碗飯，都食到成10匙，真係好飽同滿足。
估唔到一個拉麵可以分上、下兩場食法，兩種都各有千秋，令我一餐午飯可以咁豐富同飽足。不過相信只有星期五，我先可以做D咁奢侈嘅事！
喝咗咁濃稠嘅湯，又唔想喝水沖吓個口，可以試吓放喺檯上嘅清湯。
倒出嘅清湯(無記錯好似仔比目魚同昆布)香氣已經四圍飄，湯嘅味道好清甜，絶對啱晒用嚟清清口腔，沖走濃烈豬骨湯味。
"黑龍"仲有提供酢、胡椒粉及鮭大蒜等調味料。
不過我覺得碗拉麵各方面都配合得好好，唔使再添加其他味道。
出到口門，已經見到全街每間舖都有條人龍，當然"黑龍"亦唔例外喇！
真係想試一碗正宗日本地道拉麵，我覺得排隊食都係值得o架。
|
