[燈開]
[翔入,畫架,畫具置中]
[翔用力用紅色畫筆把畫紙塗滿,宣洩]
[翔到台右坐著,老師拿著一袋炭入,把一個大盤放在台左]
[老師把炭倒入盤內,同時,翔再回到畫架前,用黑色畫筆畫了一對翼,再畫一個大交叉]
[翔回到台左,跌坐在台邊,老師點著了打火機]
[電話聲出]
老師(嚇著) : 喂?!
樂翔 : Miss Chan呀,我係林樂翔呀.
老師 : 樂翔?而家好夜架啦喎,你搵我有事呀?
樂翔 : Miss Chan呀,我諗我知我個天堂喺邊啦.
老師 : 咩話?
樂翔 : 可能真係只有搵到天使,先至可以飛上天堂架.
[老師看見手上的打火機,開始擔心,連忙放下打火機]
老師(緊張) : 你講緊咩呀?你做緊咩呀?
樂翔 : Miss Chan呀,你係唔係真係覺得我D畫靚架?
老師 : 真架!你而家喺邊姐?
樂翔 : 咁就好啦,即係仲有你會記得我.
老師 : 好多人都記得你架,好多人都好鍚你架.
樂翔 : 唔會架,冇架啦.
老師 : 點會姐,樂翔呀,不如我哋出嚟食D嘢傾下計呀,好冇呀?
樂翔 : 我冇事呀,我淨係想問你一個問題咋.
老師(靜下來) : 咩問題呀?
樂翔 : Miss Chan呀,你識唔識摺紙飛機呀?
老師 : 做咩呀?
樂翔 : 你一定要摺呀知唔知呀!你應承我呀...
老師 : 做咩要摺...
樂翔(大聲) : 你應承我你會摺紙飛機比我呀!!
老師 : 咁...咁樂翔你禮拜一返學果陣教我摺好冇?
樂翔 : 唔知道,邊個會摺飛機比我呢...
老師 : 樂翔呀,你係唔係同屋企人鬧交呀?
樂翔 : ...唔係呀...
老師 : 咁你點解咁唔開心呀?
樂翔 : 我冇唔開心呀,我笑緊架.
老師 :又係你話成日笑嘅人其實係最唔開心嘅人嘅...
樂翔(靜) : 老師呀,點解冇人明白我嘅?
老師 : 可能其他人忙掛,呢個世界每個人都好忙,淨係諗自己D嘢已經霸哂所有時間,咁咪冇時間去了解其他人囉.
樂翔 : 咁點解佢哋又有時間嚟鬧我,阻止我,唔比我做呢樣唔比我做果樣嘅?
老師 : 咁因為樂翔重要呀嘛,佢哋咪願意關心佢囉.
樂翔 : Miss Chan...點解人一定要做埋D自己唔鍾意做嘅嘢姐.
老師 : ...
樂翔 : 點解明明知道自己鍾意嘅嘢係咩,但係都要放棄嘅...
老師 : ...
樂翔(失控) : 點解為左要佢開心所以我就要照佢意思去做呀...
老師 : 樂翔...
樂翔 : 點解佢口口聲聲話為我好但係又唔比我開心呀!
老師 : 樂翔...
樂翔 : 點解佢唔比返對翼我呀!冇翼你要我點飛呀!!係唔係只有喺呢度跳落去先至可以飛到呀...
老師(大聲) : 樂翔你聽我講呀!!
樂翔(失控) : 點解我要咁唔好彩點解我要有個咁嘅爸爸媽媽冇人明白我點解我要生存喺呢個世界上...
老師(大聲) : 林樂翔你聽我講呀!!
樂翔 : 點解個個都要我聽佢講但係冇人聽我講呀!!
老師 : 樂翔你咁樣係解決唔到問題架!
樂翔 : 咁點樣可以解決問題呀?跳落去..咪一了百了囉...
老師 : 一定有辦法架!
樂翔 : 冇辦法啦...佢要我讀書佢唔準我畫呀...佢唔準呀...
老師 : 點會冇呀..你可以喺你讀書以外嘅時間畫呀!!你可以完左A-LEVEL畫呀!你可以日頭返工夜晚畫呀!或者時間係短但你可以選擇開開心心咁畫呀!
點解而家做唔到就要放棄呀!!點解你唔比個機會自己去完成你嘅夢呀!!
[老師靜下來,望向火盤]
樂翔 : 我冇機會啦...我冇得簡呀...佢唔準我畫呀...佢唔準呀...
老師 : 你有得簡!
樂翔 : 我冇得簡呀...
老師 : 你冇得簡係因為你已經簡左!
樂翔 : 簡左...
老師 : 而你,簡左一個最差最差嘅選擇.
樂翔 : 但係我可以去天堂...
老師 : 你去過天堂啦咩?你又知道天堂一定比你畫畫?你又知道你一跳落去,天使就會嚟搵你?
樂翔 : (靜)...
老師 : 明明你自己有對翼,點解仲要天使帶你飛呀?
樂翔 : 飛...
老師 : 定係你對翼,就只可以飛到咁短嘅路程?
樂翔 : 唔係架...
老師 : 樂翔,無人搶得走你對翼.
樂翔 : 無人搶得走我對翼.
老師 : 只有你自己,先至可以折斷自己對翼.
樂翔 : ...但係爸爸媽媽...
老師 : 樂翔,你覺得爸爸媽媽愛唔愛你?
樂翔 : 我唔知呀...
老師 : 咁你呢,你愛唔愛你屋企人?
樂翔 : (靜)
老師 : (望翔) 你都唔好咁忙,為佢哋諗下,好冇?
老師 : (望前方) 你都唔好咁忙,為佢哋諗下,好冇?
[燈關]
|
