尋日入梅窩呀! 因為我地搞左個camp!我好早起左身,同longlong&詹仔入先.12點到已經到左喇! (之後入到去原來唔知為乜!)

跟住佢地陸陸續續都入到黎喇,我地首先買齊晒野先再租單車入去.但係我地響惠康果陣時已經好顛,嘉華,靚魚同小朱率先發顛,捉住個好可愛既鬼仔係咁mit! 最後我幫佢地影左相.我都好想影架,不過影唔切!

真係好熱,入到去屋真係好舒服囉.班友入到去之後冇幾耐又按耐唔住,走晒出去玩.剩番幾個響間屋度.我地好肚餓呀,所以整左少少野食先,唔好意思呀各位!

跟住我地都出去啦,落左沙灘.不過一陣間又走喇,因為要番去透定個爐等佢地番黎燒野食.我同詹窿走先.一路行,一路係咁驚,因為有好多蟲蟲仔!好核突!

我地番左去冇幾耐,j仔都番到黎,仲帶左副麻雀番黎添,正!

跟住開始燒喇,我發現丹尼斯個下顎好似有d唔對路,原來頭先抄左車呀! 損得好應下囉,勁大噠,個傷口勁深! 希望佢冇事啦.我地一路燒一路傾偈,真係好開心.我問丹尼斯佢地,原來佢地夜少少就走,唔過夜,當時勁失望囉.

燒燒下,小朱似乎唔多舒服,又要食藥,希望佢冇事啦. 佢之後話想沖身,但係冇帶毛巾,咁我話有多,所以借條新既俾佢.

之後要走既就走喇,咁我就負責送婷婷同阿儀出去,因為陣間要送番婷婷入黎. 阿康仔都跟埋黎呀,佢想搭上阿儀囉,但係似乎襄王有心,神女無夢lu,呵呵.

我地踩單車出果d好快就到左碼頭,點知跟住有個飲醉酒既鬼佬響度唔知發咩神經囉,講埋晒d核突野! 佢一開始係向住我行埋黎架,我仲以為佢一個汽水罐一野打埋黎添呀!好彩冇咋! 但係就講埋晒d核突野囉,勁白癡!我地都好驚,所以行開左.

跟住佢地都出到黎喇,講完88之後,我地就番入去喇.

番到去都係睇下電視咁,冇咩做.詹詹就響度煲糖水,不過我地似乎冇咩人想食.但係佢煮得好似好正咁.

夜晚11點幾到,j仔佢地話想出去沙灘度玩.但係我同詹仔因為要煲糖水,所以遲d先出,順便睇埋屋.杰仔話太累, 所以唔出.煲到咁上下,我同杰仔坐低打麻將,順便教埋詹詹,不過佢都係似乎唔多曉. 我發覺教係好難會識,一定要自己睇住人地打,突然間眼前一亮,咁就會識囉,因為果時我都係咁.

跟住j仔打黎話叫我地出去,咁我同詹詹就踩單車出去喇.出到去,佢地坐晒響度已經玩緊.佢地d遊戲幾特別,好好玩架!輸左既要受,好搞笑架!

玩到咁上下,我地都番去喇.個個都逐個開始沖涼,好舒服呀! 我借左靚魚既洗頭水,詹窿既沖涼液同洗面膏,哈哈!

跟住打牌既打牌,傾偈既傾偈.我啦,j仔啦,詹仔啦,靚魚啦,阿堅啦,阿新啦,璃埋左響間房度傾偈,超開心. 無所不談.我地竟然可以由兩點幾傾到成5點幾.如果唔詹仔提議話訓陣我諗我地係唔使訓囉!

佢地5個好快就訓著左喇!但係我仲係眼光光,豬肉湯咁,都唔知點.又失眠喇! 原來阿新好大鼻鼾聲架!勁搞野.我就訓佢隔離,所以更加唔使訓.我係咁出出入入,睇下出邊發生咩事.

婷婷佢地響度玩骰仔,輸左既好似要飲酒.佢地完全冇睡意囉!佢地仲要出去兜番轉添呀! 咁我就唯有幫手睇住間屋啦,閂好棟門.康仔訓響廳度.開住音樂訓,勁正. 不過最口我都係幫佢閂左,因為佢已經訓著左.

我繼續係咁出出入入,都仲係未訓得著. 我攤響張床度,望住天花板.我發覺詹仔好似醒左,仲要望落黎添! 我都知佢想點架喇,想睇下係咪我扯鼻鼾啦,呵,唔係我啵! 嘻嘻.不過中間有幾分鐘其實我都咪埋過眼,點知咁就慘喇! 咁就俾佢有機可乘,拍低我地既訓覺樣呀! 我就訓佢下面咋,所以俾佢由頭影到落腳囉!超樣衰呀! 詹仔話阿新訓訓下好甜咁笑左一下添呀!唔知佢為咩笑呢! 哈哈.仲有j仔啦同靚魚,都俾佢拍低左個訓覺樣.好好笑架!

我諗都成8點幾啦,佢地已經訓到死左咁滯,我又唔忍心叫佢地起身,所以就由得佢地訓啦,佢都玩得太顛喇! 我啦,阿紙啦,婷婷啦,ivan啦,決定打牌,借d倚細細聲咁用d麻將聲嘈醒佢地,因為點都要起身家嘛! 不過康仔似乎係唔使醒果隻囉,我地響廳度打,佢竟然郁都唔郁下.

跟住j仔醒左一陣,一起身就打牌喇!冇所謂啦,俾個位佢打左兩舖.我仲幫佢沖左杯奶茶添,不過佢話淡左d喎. 下次我會沖得好d! 跟住佢可能又頂唔順喇,番入房再訓過.我一路係咁打,點知一舖都未贏過囉. 平時對住ivan同阿紙已經好難打架啦,今次加埋婷婷真係冇得打. 最搞笑係有一舖明明可以食都俾婷婷截左呀! 即刻灰爆(學祖仔 )!

朝早10點踏3喇,真係要嗌醒佢地喇!但係佢地似乎仲係好累咁.咁我同阿紙就唯有拎晒食得既野出黎整啦,等佢地起身有得食嘛. 詹仔同杰仔話負責整早餐俾大家架,不過佢地太累喇,所以我都唔忍心叫醒佢地. 碗同筷子用晒,所以即刻叫ivan飛出去惠康買,好快遮.

佢地陸續起身洗面,我地亦都差唔多整好喇.因為12點要還屋,時間緊迫,所以我地好快將d野灼熟就算喇,求其一餐啦! 不過原來都幾快,大家好快就食飽晒喇,仲清理好d垃圾同執好晒野添喇! 係勁! 我地用剩左樽同好多隻雞蛋,冇理由dum左佢假,下一手既人都唔要,所以唯有俾左"事頭婆"啦.

正式踩番出去喇! 原本諗住出沙灘,不過最後都冇去到.交車喇! 慢慢行番出去碼頭,個feel好正.去到麥記傾偈,點半到,就上船喇.出到中環,我地好快就分兩批人散左.我地一行6人都係搭地鐵,所以又一齊,正!

阿新出望角,晏少少要練波; 阿堅要響太子落,換mp3,所以同靚魚一齊落,佢陪埋阿堅去換添,響太子差唔多落車果陣,俾我同靚魚繼樂樂仔之後,又發現左新大陸,就係有個好可愛既bb囉!個bb既媽咪好搞笑,話"拎去玩啦!"勁搞笑,不過真係好好人囉. 我同佢即刻影相呀!不過個bb俾我抱果陣喊囉! 唉.....次次都係咁,傷心死 ;j仔黃大仙落;詹仔觀塘落;最後終於到我落喇!

我過鴻福堂買左兩甖龜靈膏,有$15 coupon呀!好開心. 跟住番到屋企換完衫,諗住晏少少先落去買送,不過見都成3點幾,所以都係唔訓,落左去買送.

買完番黎,拿拿臨叫阿哥幫手將d相擺落電腦,預備晏少少send俾大家. 兩日一野既梅窩camp咁就完左喇! 大家都玩得好開心!真係好難得.不過始終都唔係全班一齊,所以有少少美中不足.不過都算啦,好開心喇.

跟住好快咁煮好飯,因為老竇已經番到. 今次出奇地好快煮好,唔錯啵!

跟住都冇咩事發生,咁就一日.

P.S.1:今次既camp俾我識多左3個人,ning(阿紙同肥明既朋友),堅(靚魚朋友),新(j仔朋友).好開心呀!多謝晒呀!

P.S.2:今次camp大致上滿意,好少出亂子,所以係..........成功既!

P.S.3:今次camp既地方污糟左少少,我見到好多蟲蟲呀!好驚驚呀!

P.S.4:杰仔,longlong做今次camp既organizer,多謝晒呀!

P.S.5:下次我抱bb一定唔可以再喊!哈哈.......!