今朝5點幾起左身,因為要好早出門口過澳門.一日都係冇船飛累事!

6點幾就出發了.

過到深圳都已經8點.當然係過埋關啦.

跟住搭8點15分的車過珠海.今日部車算快了,10點40分已經到左.

一去到,打俾婆婆,原來鴻仔已經黎左,但我地見佢唔到.不過到係我眼利,咁都俾我響候車廳度見到佢.跟住佢帶我地過拱北口岸,跟住再過埋澳門,即係加埋過左兩次關.過左關哥哥先醒起佢手上拎住既果盒漏左響對面關口,真係俾佢激死.仲要響度賴我話點解唔幫手睇下,真係搞笑,當時咁既情況點會幫佢睇得到,講到好似我咁.睬佢都傻.跟住行番去二舅屋企,已經累死了.

一番去見到婆婆,好開心.我地第一個到.同婆婆講話買番盒餅,不過佢又話唔使,個個都唔多食,咁我地就唯有唔買了.孻姨佢地都未到.不過好快佢地都到埋了.我第一眼見到二姨成個人瘦晒!個心即時覺得勁唔舒服!聽佢地講話佢呢年食果d止手爆裂的藥,跟住就搞成咁了.不過呢個仲未證實.但係好人好姐,有乜理由無啦啦會咁?!而家成個人落晒型,一d血色都冇,個人瘦到得番棚骨囉!隻手同個肚腩冇晒!好明顯個人係有d事的.但係佢自己又話冇乜野,仲食得行得添,但係唔知點解我見佢成個人好似冇黎精神咁,一坐低個人就好似恰眼訓咁,但係佢自己又話唔係.總之好擔心就係啦!

跟住一齊食飯.孻姨丈似乎尋晚好夜訓,今日個人好殘,食完飯走左去床度訓了.

不過我地好快就出發過賭場了.不過二姨話佢唔去了,但其實我好想同佢一齊出去行下.

跟住我地過左賭場,果間叫"金沙"的物體.玩左一陣就走了,今日孻姨丈似乎冇乜運,輸左錢.

跟住我地就走了,我就響賭場門口果個噴水池度影左幾張相.不過硬係覺得自己影得好差.

不過都好似冇影響我地行街的心情,我地過左隔離的"Fisherman's Wharf"度周圍行.一路行一路影,自己影d,同佢地又影d咁.

跟住我地仲響果度買左野添,孻姨買左盞記燕窩再加一件羽絨褸,太有錢了.跟住我地再殺過去八佰伴,今次係我第二次去.孻姨真係太有錢了,響果度買左隻$3000+的戒指.跟住我地再上八佰伴買野,買左好多野,我自己都買左少少,不過都係食的.

跟住我突然間醒起未買聽日走的船飛,所以就過左港澳碼頭度買了.真開心,竟然俾我買到.婆婆今朝仲同我講話新聞講D人買唔到聽日番香港的船飛,好彩俾我買到遮.結果買左一點.

跟住番番二舅屋企食飯.食完之後,拉左D細佬妹影左D相,跟住佢地就走喇!好短的一日咁就過左喇!多數都要等下年先再見了.臨走前,我一再叮囑二姨記得番到江門要睇醫生,因為真係非同小可的.病向淺中醫嘛,真係唔明我呢個家族D人咁唔鍾意睇醫生的,有病就由得佢.唉.......

跟住佢地走晒了.哥哥想塞D錢俾婆婆不過經過一場激烈的推讓戰之後,最終輸左.臨走前仲要大聲同我叫我俾,真係唔得佢死.唔使你講我都會啦,我就唔會好似你咁推黎推去,因為一定唔成功的.我自有辦法.

今日好似成日都冇提過二舅同二KUM,因為佢兩個今日冇得放假,搞到佢地見唔到了.

跟住我就洗左隻腳同塊面,由於過一晚夜既關係,今晚唔沖涼了.婆婆拎左條褲俾我換黎訓覺.

跟住夜晚9點幾二kum就番黎先,坐左一陣,傾左一陣,10點到,二舅都番埋黎了.跟住都係我衰,無啦啦提起食生果,搞到二舅又走落街買,叫左佢唔好的,不過佢都係要落.不過亦都同時俾我發現左原來macau既生果檔係咁夜都未閂的.跟住都幾搞笑,二舅響下邊兜左個圈番上黎問我地鍾意食邊隻生果,話再落過去買,跟住婆婆同二kum就圍攻佢話佢做野唔識爽快,搞黎搞去,仲叫佢唔好鬼落了......不過最終都平熄左.不過當然嗌完之後又冇事啦.

跟住訓喇.今晚搞到二舅要做廳長,唔好意思呀!

訓落張床度,叫阿鴻較定鬧鐘.可能訓唔慣啦,好耐先訓得著.一黎"步床"掛,二黎好擔心二姨,一諗到佢個心就好唔舒服,訓唔著.之後就斷斷續續咁訓.......