琴日帶左阿嬌去睇醫生, 等左 9 個字, 睇左 3 分鐘都冇, 埋單 $1030.

樹獺:  佢d牙肉又紅又腫, 刷牙既時候d血係咁標出來.......

Dr.xx:  咁樣流牙血係好唔尋常架 (所以咩來睇你囉)

樹獺:  咁...會係咩事呀? (好憺心)

Dr.xx:  牙肉紅得好緊要喎, 發炎...(我知呀)

樹獺:  但係佢一d牙石都冇喎, 有同佢刷牙架, 不過係咁流血......

Dr.xx:  唔好同佢刷牙啦, 咁樣會好痛架, 拿,我開隻xxxxx俾你, 再開隻xxxxx俾你,

           咁樣流牙血係好唔尋常架 (我就係想知點樣唔尋常)

樹獺:  咁會係咩事呀? 都冇牙石! (點會有牙周病)

Dr.xx:  其它有冇咩事呀? 咁樣流牙血係好唔尋常.....

樹獺:  好正常, 凈係流牙血, 會係咩........(好想知點唔尋常)

Dr.xx:  可能細個食左d咩, 呢隻菌 (唔明佢想講咩) 咁樣流牙血係好唔尋常,

           我開d抗生素俾佢 (又話好唔尋常, 抗生素唔使睇你啦)

樹獺:  咁如果唔好會點呀? (你講到咁唔尋常)

Dr.xx:  我先開 10 日冇類固醇既抗生素俾佢, 唔得先再開有類固醇既, 都唔得

            就要全身麻醉, 同佢洗牙 (都冇牙石) 囉d組織去化驗, 咁樣流牙血係好

            唔尋常既, 10 日後番來復診啦!

係出邊等俾錢

樹獺:   幾錢呀?

助手:   $1030.00

樹獺:   幾多話?

助手:   係d抗生素貴咋,  $380

樹獺:   咁其它咩來架?

助手:   拿呢枝搽牙肉既 gel, 去牙石 $130, 呢枝防牙石既, 加落d水到俾佢飲 $270

樹獺:   咁多貓狗點知邊個飲左呀?(會唔會有事架)

助手:   全屋d貓狗都飲得, 我地d客唔俾刷牙既好多都飲緊 (我d全部都俾刷架),

            冇事既, 5ml 開一個綠茶樽 (500ml)

樹獺:   我地一日飲好多.....(呢枝野飲得幾日呀!)

助手:   診金 $250, 同你約埋復診呀, 你約幾時呀?

樹獺:   咁快約, 10 日葯喎? (你一早知 10 日後都唔會好啦)

助手:   呢排好 full, 你都要復診既啦

樹獺:   10 日喎! 我返去睇下先啦! 

            阿嬌, 你睇下張單, 不如你搵份看更做下.......

阿嬌:   .............(呢個女不嬲都好靜, 好乖.......)

$1000 唔緊要呀, 你要話俾我聽咩事先得架!  如果咁樣流牙血係尋常既, 唔使來

睇你啦!

唉......拖住個女竟然就咁由九龍城行左返屋企,  返到屋企先發覺枝 gel 係外用既, 咁仲搽唔搽啊?  天啊!!!