呢兩日，唔洗番學，唔洗考試，無溫書。訓下，食下，諗下，周圍行下。

諗下我而家渾渾噩噩、營營役役o既生活有咩意義。

尋晚終於諗到傻左，無他o既，除左呢度，仲有邊度可以比我發洩o者？!  如果有d問題諗唔通係好痛苦的話，我想講我有好多問題諗唔通 (定係根本我份人有好多問題？)  因此就打左上一篇野。信我，我平時唔會咁樣鬧人，因為我未遇上過可以令我大動肝火o既人 (我老爸例外) 到左今日，我真係信世界上咩人都有，我信表妹同我講o既野：係我o既世界太完美，我太無知，世界上仲有好多好可怕o既人，只係未遇上。

我覺得世界會令人瘋癲。有句野想打好耐："瘋瘋癲癲上學去，呆呆滯滯回家裡。"  實在太適合形容我o既生活，已經唔止一次有人同我講：Kaman你傻左呀？

聽罷，先發覺自己過左火，裝假都未免太過份，笑已經唔係用黎粉飾我o既憂愁，而係變左慣性、無自制又誇張o既行為。每一日都好似傻婆咁混過去，放學啦，又要對住部電腦做野溫書，不禁問自己：表情有何用？既然無人見到，咁喜怒哀樂留比自己就夠啦。如是者，我變左個睇落冷酷無情，要敬而遠之o既人。

考完gen mic lab果日，我突然發覺自己原來唔係咁緊張gpa，咁讀大學黎做乜呀？真係為理想、為興趣？係就讀好d啦.... 咁究竟讀大學為乜呢？我又唔係為左個first honour，又唔係要為科學犧牲，又唔係要玩足3年，更加唔係要釣隻大金龜，咁我係度做乜？正確d黎講，我可以做d乜？

人生就係有咁多野要煩，有咁多野要諗。耐唔耐比d時間自己，停一停，諗一諗，未免唔係好事。不過.... 考試將至，都係唔好諗咁多，溫書吧啦~  到時gpa插水，又多樣野諗架啦....唉~~

(篇日記打完又delete，delete完又打，跟本唔知自己想打d乜野.....)