「上次企左o係天橋度, 都冇留o係海傍就走左啦 」
「呀…… 係…… 」
「你呀 o個時幾咁低B 識著你真係三生有幸…… 」
「但係我…… 」
「我都未講完…… 同你相處耐左, 你都進步唔少丫
呢一排, 除左頭先之外, 你都冇做過其他低B野呀 」
唉 始終都係柒左一次
「你改變好多呀, 所以……」
佢合埋眼






究竟佢係點諗?
佢係想試探我係咪當佢係朋友only?
定係佢想我再進一步?







我決定錫下去
一直以黎, 我同佢o既感覺
我對佢細微o既表情變化
我相信自己o既直覺……








人生如戲, 有好多好多事情就係咁戲劇性
如果你呢d事因為好似拍戲咁
而覺得現實冇可能會發生
咁當呢件事發生o既時候
你就會因為準備不足, 而錯失呢個機會








無論你信唔信都好, o係o個一刻
我個腦浮現起o個次電話響起o既畫面
事情就係咁戲劇性
就係o個一刻o既遲疑, 佢就已經開左眼
「哈哈, 你冇非禮到我喎 」佢再一次笑左一下
「唔……er……點知你姐 」
我因為頭先o個一刻而差d回唔到神, 但係我察覺到o個下笑容
「今次咁叻 cup一個兔仔印比你啦 」
「喂…… 好啦喎 」
同佢又開始單單打打, 直到送佢返佢屋企為止
事情好似冇變, 一切好似回歸平常
但係事實上, 或者已經係覆水難收……
因為o個個笑容……
 

-------------------

自從o個日之後, 我同佢聯絡o既方法完全失效
於是我決定左日日o係樓下等
我選擇左一個附近o既公園等佢落黎
我唔知佢避我避到幾時
但係我相信佢會落黎見我一面

到左幾日之後o既一個下午
當我o係度望緊花花草草o既時候
有一個人出左聲:「喂 低B俊 」
一把有少少唔同, 但係我仍然想聽o既聲音
我望過去, 一個我最想見到o既人
但係佢個樣, 我睇出係……
我知道我今日唔講, 可能以後都冇機會再講
「阿Jess……」
「你做乜呀 懶認真咁 」佢仍然想扮到以前咁, 但係佢把聲沙左好多
「我…… 我…… 我愛你…… 阿Jess 」
「下 你話乜野 」
「我愛你, 阿Jess 我好想保護你, 我好想同你o係埋一齊 」
原本準備左o既台詞冇用到, 我只係講左我最想講o既野……
一個好普通, 根本冇可能令到女仔鍾意你o既表白呀可














「太遲 太遲啦 」佢開始眼濕濕
一直一直, 佢係一個幾咁開朗o既女仔
我甚至幾乎冇見過佢唔開心o既樣
次次「那」埋塊面, 佢一定o係半秒之來串我 之後笑返
但係今次, 我整喊左佢……
我好想攬住佢, 安慰佢……
「你行開呀 」佢推開我, 終於喊左出黎
「阿Jess, 我係真心架…… 」
「點解你要咁遲先講 點解 由一開始見到你o個陣, 我就已經好鍾意你……你雖然好傻, 但係你好真, 你比到我好多好多安全感 」
「咁, 點解呀…… 」
「你知唔知咩叫火花呀? 火花唔會等人架, 我雖然好鍾意你, 但係已經係過去式啦……」
「咁點解你仲要比機會我……同你成日一齊 」
「我曾經比過好多次機會你, 一直到1月14日我生日, 我好想你同我講 我好想你比我一個承諾…… 但係你冇咁做…… 你冇呀…… 心入面o既安全感已經流失得一乾二淨啦…… 」
「我…… 我…… 」
我好想令佢再次相信我
但係我喊到收唔到聲
原來我一直做o既都係錯
「我要去外國, 陪我屋企人一齊走……你忘記我啦……」
佢走左, 我好想追過去, 但係我行唔郁
我嗌佢, 佢冇回過頭
我好憎以前o既自己
點解我要咁做……
點解我要……
點解……












幾日之後, 我問管理員, 佢已經搬走左
佢冇留低任何聯絡方法
直到今日, 佢msn都一直冇on
我傷心左好耐好耐
直到今日, 我都未能夠完全復原
 

------跳至半年後----------

呢半年我都唔知點過
有時上黎假 下過下日晨
臨訓前會check一check email
有兩三次見到佢send email
次次未睇就開心到扎醒左
(屌, 發夢都睇唔成 )
估唔到今日佢真係send左封email黎
我反而咁淆
我好驚封信入面會係令我失望o既答案
所以一直都唔敢開
但係冇理由架, 我等左咁耐
唔係等呢一日咩
如果個結局真係咁差
我咪死心囉










諗就咁諗
結果掙扎左好耐
比人當假 屌左半個鐘先醒
終於襯衝動o既一刻開左
















屌, 呢一個moment心情唔知點形容
括號入面係我講o既


低B俊:

唔經唔覺, 原來已經離開左香港半年啦? 時間過得真係快~

你知唔知呢半年我o係英國生活得幾開心呀~ 我一落機就... (下刪1000字, 私人野多 )
所以就忙左少少, 冇時間睇你o既email~

算啦算啦, 我知你唔信架啦~ (其實我真係會信... ) 你冇估錯, 開頭我根本唔想理你,
丫唔係, 其實我一直都冇打算睬你! 不過最衰都係你, 連自己個名都打得錯! (我習慣
email o個度打返個名) 搞到我以為係當地識o既香港人寄俾我...你知啦, 人地o係o個
度住左幾年, 講慣英文架~ 最多咪提下個姓~ 好似你見工咁講全名咩! 佢個姓又同你
一樣喎, 我咪誤會囉......
(本來我好感動, 而家... x2036唔洗找)

咁既然click得入去睇, 又冇理由唔留幾隻字... (的確係「幾隻」字呀下 ) 況且我又
唔係d咁小氣o既人, 都過左咁耐囉, 大家係咪做唔返fd先? 唉, 我解釋咁多做乜? 總
之呢, 以前o既野就當粉筆字咁抹左佢, 除此之外冇任何意思, 你唔好諗錯隔籬!
(係o既, 我仲可以奢望d乜? )

咁就哂左我半個鐘啦~ 我星期六就要返去香港過暑假, 踢哂腳咁, 仲要哂時間覆你! 唔
駛覆我啦, 呢個禮拜我冇時間check email~

Jess




諗到點形容啦, 百感交集
 

-----------

真係波折重重......
尋晚我再一次o係msn煩住阿Jess個fd
結果係點, 我諗你地都估到
失敗o既我攤o係床上面望住個mon
望住一個一個msn登入登出
但係就唔見佢o個msn出現......
o個一刻我成個人崩潰哂
乜都唔想諗, 淨係暱埋o係被竇入面喊
傷心o既我加埋勞累, 好快就訓著左

結果當我一開眼
先至記返起最重要o既一件事
send email
我拿拿臨click個firefox
但係死人網上爬竟然玩龜速loading
然後望見個鐘
仆街, 要遲到呀
我一路刷牙洗面換衫食野
都見唔到個homepage
臨出門前, 見到「找不到網址」幾個字
知道又斷左線
於是我決定出門
但到上左車先黎後悔

講真, 遲到最多比老細罵
但係而家咁搞法
姐係淨返一日到比佢覆
睇黎今晚要買定材料開始做勞作......
雖然我算訓多左少少
但係因為太心急o既關係
成個上午錯漏百出
好彩我d同事算體諒我
(可能我平時柒得太多掛... )

到左lunch o個陣就更加心急
我部電腦本身上唔到網
但我都唔夠膽借同事o個d黎用
更加唔知道公司附近有冇網吧圖書館o個d
唉, 好辛苦先過左半個鐘 (我冇去食飯 )
心諗咁樣等都唔係辦法
見到附近有份報紙就拎左黎睇

真係夠巧合
揭到去某一版, 有幾隻字吸引左我o既注意
「空姐如何和男友連繫感情」
如果我同佢真係一齊o既話...
情況應該差唔多呀可?
睇到一句
「只要有心, 相距千里也會想辦法令對方感受自己的心意」
忽然有d領悟...
心意, 冇錯
心意係最重要o既
我而家最需要o既係先清楚對方o既心意

或者因為諗通左啦
下午冇咁難捱
放工搭車o既時候
一路拎住o個篇文睇 (睇左應該唔止十次... )
但係到到返到屋企啦
開firefox啦
焦急o既心情又再一次出現......
















佢send左email比我
今日咁戲劇性o既
拿拿臨開黎睇...
佢話佢上一封email唔記得講邊班機
又睇死我唔夠膽問佢 (..........................講中一半半啦 )
於是就send多個email比我
真係「踏破鐵鞋盧覓雪, 汪明荃不費工夫」












不過佢竟然話帶個fd比我識
係男係女呀
救命, 今日坐過山車咩
低b俊:

呵呵, 驚我有bf呀? 半年前我戇居左一次, 而家緊係要慢慢了解人地啦~ 個男仔又的確幾好喎......

拿, 問得就當你黎! 唔黎冇fd做!

Jess
 

-----------------

尋晚雖然好早就攤o係張床度
但係我實在太緊張啦
o係張床度典黎典去
個腦不停咁run, 停都停唔到......

經過漫長o既一夜之後
終於到左起身接機o既時候啦
(其實我都唔知自己有冇訓到o既... )
或者係因為太興奮掛
望住鏡入面o既我
我覺得自己連老虎都打得死幾隻
於是沖左個靚涼
嘆左個常餐
就正式出發啦

但係到機場o個陣竟然早左成個鐘
不過似乎都arm
因為我發現有d機係會早到o既 (我大鄉里 之前唔知 )
無論點都好啦
我而家要做o既野就只係等......













我唔係未試過等一個人
但係一直一直, 都冇試過咁耐
我已經等左半年啦
但我仲有一個鐘要等
只不過呢個鐘
就好似等左半年咁耐
因為呢半年o既畫面
不斷o係腦中盤旋......

sorry, 有少少感觸添
有時就係咁橋
當我情緒仍然未平復o個陣
佢就出現左啦
雖然有少少唔同
但我一眼就認得出
於是我就拿拿臨抹走o個兩三滴眼淚
先至向佢揮手
當我諗住舉起隻手o個陣
先知道佢已經發現我
仲向住我呢邊揮埋手
唔通頭先咁柒o既畫面比佢見到
而佢行得愈黎愈近o既時候
我除左識得機械式揮手之外
就淨得呆左o係度......

佢戴住一副眼鏡
見到佢身上o既衣著
發覺佢識得打扮左好多
講真, 佢睇落係冇以前咁純咁真 (少少咁姐 )
但係就吸引左好多好多......














「哎呀 」比人敲左個頭一下
「做乜成碌木咁架 低b俊 」
「呀 我地係咁打招呼架 係咪嚇親你呀 」
聽到阿Jess咁講
我先至留意到佢側邊有個男仔......

老實講, 一望到佢
我個心就有d慌
佢起碼高我半個頭
亦都型過我好多
雖然我見過唔少人著西裝
但係好似佢著得咁型o既
真係少之又少

「呢張係我o既咭片呀 唔知點稱呼你呢 」
「我...我叫呀Roy呀 」
雖然我有d怕佢o既眼光
但當住阿Jess面前, 我要表現得堅強d
「你叫Louis呀」
我讀左lu-vis
跟住阿Jess側埋一面, 掩住個嘴...







「都有唔少人咁讀o既 但係更加正確o既讀法係lu-vi, 冇s音架 」
「都話左架啦 佢一定會讀錯架, 你又唔信 」
見到阿Jess經典o既恥笑表情 (一般人淨係會覺得佢係 )
我就知我柒得幾離譜
一見面就咁, o個刻真係想搵窿捐
柒左兩次之後, 我地就一齊離開機場啦
我地先到Louis住o既酒店放低兩個人o既行李
我嚇到以為佢地兩個一齊住
點知只不過係阿Jess擺住d行李先 (係呀我又比佢串呀 )
跟住都差唔多三四點, 我地就出去行下
但係天色似乎唔多好
於是我地主要都係室內活動
最尾變左陪阿Jess shopping
(乜佢o係英國唔係已經成日買野架咩 )

結果有d出乎意料
o個幾個鐘我同Louis傾計多
相由心生係arm架
可能因為佢接觸o既人好多
所以佢o既見識真係好廣好廣
睇落去先會比人一份穩重o既感覺
我雖然細佢兩三年
但自問呢三年點追都追唔上佢
o個幾個鐘我學到唔少野
例如知道E=mc^2其實唔係代表相對論
DHMO其實係乜
行左唔知幾耐
阿Jess見我地咁好傾
忍唔住問我地其實係咪一早識
喂小姐我都唔想架
你淨係識得隔十分鐘就問我一條問題
唔係「呢隻耳環靚唔靚呀 」就係「o個件衫你點睇 」
我都要揾野做消磨時間架









咁當然我唔夠膽講出口
可能佢都開始累啦 (話哂成三粒鐘...... )
於是佢就話想去食野
仲問我地有冇意見
我地兩個大男人都無奈地笑左一下
(想像下 個嘴變成微笑, 我好似見過呢個改圖 )
總之你話點就點啦

於是我地就搭去另外一個地方食野啦
係一間食牛腩面o既鋪頭
我同阿Jess都食過幾次咁
我地三個「男女男」咁坐
大家都累到冇乜點出聲
但一出聲, 我就柒左......

話說我地經過一條街o個陣
Louis好似望到一d野咁, 然後唉左一聲
阿Jess好快就知乜事
「係咪望到間公司, 諗起d唔開心o既野呀 」
跟住Louis就講佢o個幾年o既苦況
見到阿Jess好似好關心佢
心中少不免一陣葡萄
於是諗住鼓勵Louis為名, show off自己為實......

「其實你都唔駛咁唔開心丫 凡事要一步一步咁黎 好似以前有個人,
叫做木下藤吉郎, 佢本身只不過係一個平民咋嘛 奮鬥左幾十年終於統一左日本
佢就係後黎o既... 」
「羽柴秀吉 之後仲改埋名做豐臣秀吉添, 可 」
頂, 我竟然唔記得同阿Jess講過 仲要記得咁清楚
「好心你啦 成日用埋同一個例子, 悶唔悶架 」
「咩呀, 人地可能未聽過呢 」
「你識d唔識d, 盞教壞人姐 」
「邊個話我唔識 」
「o個次叫你講多d 講左三分鐘我都係一頭霧水 返去查wiki先明咋陰公 」
「好囉喎...... 你今日串夠未呀 」















「你地感情幾好丫...... 」
我再一次見到Louis o個個無奈o既笑容
「你咪誤會呀 我唔想佢教壞你咋 」
「唔係丫, 佢個例子幾好呀...... 不過都要織田信長睇得起佢,
加埋之後本能寺之變信長死左, 秀吉先會有咁o既機會...... 」
「原來你都知架 但係我都係覺得...... ...... ...... 」
o個一刻我發覺自己講唔到落去
同Louis比, 我真係......

o個餐面我食得好無心機
雖然我盡量扮到冇乜野
但係見到佢地兩個時不時講野
我就搭唔到嘴咁
心入面好灰好灰
佢地聊我講野, 我都係一句起兩句止
原本以為今日係咁先架啦
點知當我食到一半o個陣, 阿Jess就話:
「Louis呀 今晚我要趕住返屋企, 不如你陪我返去拎野丫...... 」
咁快就走
「但係你個fd未食完喎」
「你唔好怪佢啦 佢冇胃口o個陣係食得慢d架啦......
佢應該唔食架啦, 係咪呀, 阿俊 」
阿俊










頂你今日淨係叫我低b俊
而家終於當返我係個人
「你唔食o既話就陪我地一齊走啦 我都冇乜點同你傾... 」
你有野同我傾
梗係即刻點頭應佢啦

之後我地三個人坐車返去hotel
Louis本來話要送阿Jess走
但係阿Jess話唔想佢辛苦
(點解阿Jess成日為佢著想 )
話我送佢送到慣哂喎
唔爭在送多一次
於是而家就淨返我地兩個人
我諗你地都覺得, 咦係時候表白喎
講就咁講......





唔通當住地鐵乘客面前表白咩
唯有講其他野啦
講講下就問佢過去半年讀緊邊間學校
先知道原來佢已經返左半年工
一路問落去, 仲知道佢係英國出世o既
真係好震驚, 同我之前諗o既完全唔同o既
我地講左唔係好耐
可能大家始終有d隔膜
都係一句起兩句止, 好快又靜左
但係過左兩分鐘後, 佢話......
「今日...... 」
「唔 」
「今日我係咪過左火位呀 」
「er, 你講邊樣先...... shopping定係...... 」
「我好似串得你太多 」
本來好想講句「你終於都發覺啦 」
但係望住佢個有少少歉意o既樣............
我即刻擰埋一面
因為feel到自己面紅.....
「sorry呀 我係咪激嬲左你 」
「其實唔係o既...... 」
「當我仲以為你同以前一樣, 所以先咁過火...... 」
「唔......」
我想答唔係
但我過唔到自己o個關
似乎有d野我真係變左
但我又講唔出係乜

話咁快就落車啦
佢話佢住返以前附近喎
所以我選擇左同佢慢慢行返去
行下行下, 開始冇咁多人 (我o個區算幾靜 )
愈靜, 我心入面o既掙扎就愈大......
我開始諗o個樣野
攬住佢, 然後同佢表白
同佢表白之後先攬實佢
定係等下次先
但係會唔會冇下次架
















忽然佢踏前一大步, 去到我面前
「阿俊, 你合埋眼丫 」
「下 乜事 」
「你合埋眼先啦 」
「好...... 」
我乖乖地合埋眼......
似乎有d野發生
不過通常呢個情況下冇好野
但係又好耐都冇動靜喎
唔通又搵手袋扑頭
但係佢今日得個喼咋喎
唔通要踩我隻腳
但係今日我對鞋夠厚, 應該冇咁痛......
















「嘩 」
佢竟然搣我耳仔
「你唔係以為我會錫你呀下 」
「冇呀冇呀 」我都估到冇好野架啦
「咁點解塊面咁紅 」
「生理反應丫嘛 我都控制唔到 」
「姐係有啦 」
「你姐係打橫黎講姐...... 」




「哼 」
佢終於肯鬆手啦, 痛死我啦
「呢d叫小懲大戒呀, 低b俊...... 你知唔知你今日好戇居 」
「係...... 」唉, 明明十五分鐘之前都仲係好善解人意架
「不過有Louis o係度, 我知你諗乜o既...... 」
「真係 」
「佢咁犀利, 你梗係自愧不如啦 」
「...... 」
「我就話唔mind你咁蠢姐 但係下次有其他人就唔可以咁樣衰, 知唔知 」
「係...... 」似足見訓導主任
等等 咩話 下次





於是o係我未反應得切o既時候
佢就一支箭咁衝上樓啦
而我就呆左一陣
之後先慢慢返屋企
唉 我好似on 咁又一次浪費左個chance
 

-------------

至到七月十八號．．．

呢一晚, 我o既msn上面出現左一個好陌生o既名
但係, 當我同佢傾左兩句之後
我就知道佢係Louis......

講左幾句之後
佢就問我想唔想聽一個由頭到尾
大概係半年o既故仔
半年








我好快就估到佢要講咩
「你信唔信緣份架」
我唔知, 但我冇答
「本來我唔信, 但係o個日我係公司樓下間餐廳撞到佢...」
我知道佢要講o既係阿Jess......
但我仍然冇講任何野
我淨係想靜靜地聽
「其實, 當我安排左幾次巧遇之後, 我就應該明白, 自己係冇可能
只不過, 當我諗住就黎要失敗o個陣, 個天比左一次機會我
我一直未試過o係一個女仔面前表現得咁狼狽
但係就係因為咁, 我同阿Jess開始左......

雖然我地從來冇正式成為一對情侶
但佢o個種溫柔體貼
係我以前o既女朋友比唔到我o既
而我亦都慢慢認定
佢會係陪伴我一生o既人

只不過天意弄人......
當我同佢表白之後
我就知道, 佢要離開英國

我唔甘心, 我決定返黎
我要清楚你究竟係一個乜野o既人
點解可以令佢一直都唔放棄o個條手繩......

o個晚我好唔甘心
我諗唔明, 完完全全諗唔明
但係呢幾日, 佢帶左我去見佢d fd
我終於明白, 我同你o既分別

但我唔會話比你聽係乜
我同你講呢個故仔
係因為我知道自己搶唔贏你
我希望你可以比佢幸福
我唔同你講個原因
係因為, 如果你咁都諗唔到
你就唔值得再同佢一齊

我知你會好憎我
我都係一樣咁憎你
但我知道, 只有咁做先可以令佢開心
冇錯, 我就係咁傻」










腦中浮現o既, 係佢無奈o既笑容......
 

-----------------

請睇返最上果個日誌