這兩天,我,da,kidd,mo and 介一起上了番禺,星期一上去,但落狗屎.....

星期一晨早去到粉嶺集合,上到去不停咁落雨......去到<番禺長隆野生動物園>,落得仲大......但我地都堅持去玩機動遊戲,只係著埋件雨褸去玩姐! 去玩第一個過山車大家都已經差不多成身濕哂.....但之後都係愈落愈大雨,一路玩就一路濕,真攪笑....之後我地仲去玩射水槍同玩一個好似海洋公園個滑浪飛船,玩完就真係濕哂,好記得亞mo當架船衝落去d水既時候,佢第一句就好大聲咁講:頂,我而家連條底褲都濕埋喇......超攪笑...

之後原先我地一直都打算玩完可以即刻返去隔離既酒店沖涼,先至去睇馬戲.....點知我地6:00幾打算走既時候,d工作人員同我地講話如果我地出左去,就冇得再返入黎睇馬戲,因為張飛只可以用一次....但馬戲要成8:00先開始,最後我地就好無奈咁,濕住個身等左2個hrs睇8:00開始既馬戲......睇完都差不多10:00,我地即刻衝返酒店沖涼....之後就落左間bar食野,之後12:00就book左做香薰推拿~做完都成2:00lu...我地個個都散哂咁滯....

第2日又8:00起身,去左<白老虎餐廳>食早餐buffet,晨早流流飲既第一啖野,竟然係一杯類似洗腳水既蘋果汁,飲完仲有d<拿喉>, shit...之後就去左睇什麼蜜蜂,冬蟲夏草等.....其實諗返依個trip都幾貴,唔抵...但住果間酒店就好正,好少可咁滿意大陸既酒店,哈哈~

下次亞mo話7月攪去泰國,6月可能會入離島玩,唔知大家有冇興趣呢??如果有興趣去泰國既,請大家一定要check定d passport有冇過期啊~keke^^

聽日就要返工lu....不過前日o係大陸做完果個香薰推拿後,而家對腳唔知點解每行一步條根都好似扯得好犀利咁,聽日都唔知點返工喇,仲有尋日可能食得太多油膩野,所以尋晚訓到半夜突然好辛苦,濟住濟住,於是就去廁所係咁嘔,嘔完成個口苦到想死咁濟,唉,依排可能真係食多左好多野,食到過哂龍...而今日由於係自己最後一日既休息日,所以訓到成晏晝3:00幾先起身,非常充實~哈哈

希望聽日順順利利....