今日一早就起身同埋亞媽陪亞細B去診所睇醫生，因為佢依２日條氣都好促，好似抖唔到氣咁，我同亞絮已經日日都同佢去碼頭睇醫生，但尋晚佢個下唇仲要變埋紫色，嚇到我地死，於是我地今朝就同佢去睇完醫生，醫生睇完佢之後，直情寫字叫亞Ｂ入醫院ＣＨＥＣＫ，因為最怕係佢缺氧，所以個咀先會紫色。

於是我就同亞媽即刻返屋企執好哂野，就同亞Ｂ去屯門醫院。去到急症室見到亞Ｂ俾幾個姑娘禁住佢又要抽血又耍抽痰，話佢既血氧量係８０幾，再加上亞Ｂ一出世就有輕微既地中海貧血症，又要係早產ＢＢ，見到佢咁細個ＢＢ就有咁多野，真係見到都心痛．．．唉

後尾亞Ｂ要留院住，仲要係住隔離病房，即係夜晚冇得留家人ｏ係醫院陪亞Ｂ，後來佢亞媽收工趕黎都好擔心．．．夜少少亞Ｂ爸爸話佢已經出左Ｘ光，好彩個肺冇花到，唔係肺炎，佢而家係屬於小支氣管炎，唉，希望亞Ｂ快Ｄ冇事出院啦，最好以後都唔駛再入醫院，做個健康小Ｂａｂｙ吧∼

再加上由於今日亞媽ｄ舊同學黎食飯，所以我地都趕住要返屋企，其中亞媽有２個同學係做醫院護士，佢話亞Ｂ既血氧真係得８０幾的話，係代表佢缺氧得好嚴重，因為正常係會有至少９８－９９度，所以Ｄ護士都即刻俾個氧氣罩佢聞住先！唉，唔怪得亞Ｂ依２日都不停咁又叫又喊，好似好辛苦咁啦．．．

而家一諗起佢自己一個人ｏ係隔離病房就好想喊，咁細個小朋友，夜晚喊又冇人理，都唔駛旨意ｄ姑娘見到亞ｂ喊會好有愛心咁（乙水）返亞Ｂ吧．．．

真係真係好希望亞Ｂ可以快Ｄ好返