頒獎禮於前晚就曲終人散，賽果算得上順應民意，大熱柴九哥與四奶奶成功榮登視帝視后，《巾幗梟雄》更奪得9個獎項成為大贏家，認真要恭喜恭喜。說真的，今年TVB的節目我真係睇得好少，10隻手指都仲有剩，即使係全城熱播的《宮心計》及《巾幗梟雄》我都冇睇過。所以，本人對賽果沒有任何滿意及不滿意，不過以下係我個人的對頒獎禮的意見及心水(只限某些有興趣的項目才顯示)： 

最佳劇集：《巾幗梟雄》
評語：冇睇過，畀唔到

最佳男主角：黎耀祥《巾幗梟雄》
評語：冇睇過個劇，但演技好係公認架啦，所以冇異議!
心水：羅嘉良《富貴門》(劇本雖然係爛，自己都冇繼續追套劇，不過都掩蓋唔到撈家的演技!)

最佳女主角：鄧萃雯《巾幗梟雄》
評語：冇睇過個劇，但演技好都係公認架啦，值得拎!不過都應該係一個遲來的肯定，早在2004年應該憑如妃一角拎女主角啦!

最佳男配角：謝天華《學警追擊》
評語：其中一個唔太滿意的賽果，套劇都係冇睇過，但大不了都是只把一個laughing哥熱潮掀起了，繼而拍住兩大影帝拍了電影而已。演技好?Sorry，五強入面最好戲果位一定唔係你!
心水：李國麟《宮心計》

最佳女配角：謝雪心《巾幗梟雄》
評語：早在未播《巾幗梟雄》之先，我已聽過心姐的名字，因為她與HOCC拍了一個音樂短片，做HOCC的師傅。但都是07年的事，冇想到，宜家人氣應該比HOCC更紅吧XD
其實單是睇《宮心計》及《巾幗梟雄》的少少片段，都已經覺得心姐做戲好有氣勢，女配角根本就是囊中物吧!

我最喜愛的電視女角色︰姚金鈴(楊怡 飾)《宮心計》
評語：早知道唔係畀阿余就畀佢架啦，事後有人話奸角點會係「最喜愛的角色」?有咩所謂姐，反正呢個獎多數都比親生仔女當獎勵架啦!
心水：殷賞(毛舜筠 飾)《畢打自己人》

我最喜愛的電視男角色︰柴九(黎耀祥 飾)《巾幗梟雄》
評語：柴九哥拎都OK，不過係子華會仲正XD
心水：麥提爽(黃子華 飾)《絕代雙驕》

飛躍進步男藝員︰敖嘉年
評語：無。

飛躍進步女藝員︰陳茵媺
評語：無。

最佳節目主持︰曾志偉、錢嘉樂、阮兆祥、王祖藍《鐵甲無敵獎門人》
評語：擺明造馬，沒有阿Lo，獎門人的鐵三角組合根本唔完正，新加入兩個完全一d作用都起唔到，遊戲仲愈來愈冇新意。畀我揀，五強入面我揀君如，至少證明嘉樂拍住其他人都ok呀!
心水：吳君如、錢嘉樂《星星同學會》

最佳綜藝資訊節目︰《星星同學會》
評語：應該呀，我好少會追清淡節目睇架，期待下年的「至尊版」。

最佳表現大獎︰楊怡
評語：擺明就係豬肉獎啦，仲死口話係專業評審，慳d啦。出年呢個獎一定冇左，唔知又會換咩名出場呢?

tvb.com人氣大獎：黎耀祥
評語：不如取消左佢，冇咩實質作用!