相信各位有睇過本人對於電視頒獎禮的意見及心水後，都應該知道本人曾提級，今年本人所睇過的電視節目不下十個，無他的。主要原因係：

1. 演員不吸引：
新一代的鍾嘉欣、陳法拉完全唔係我杯茶；
老戲骨唔係個個都like，今年係得羅嘉良先令我會去睇《富貴門》，但都冇完全睇晒

2. 節目冇創意：
宮心計抄大長今，又係勾心鬥角，悶死啦；
獎門人冇左阿lo，基本上冇意欲睇，D遊戲完全番炒再番炒，改少少野當新game，唉!

言歸正傳，回顧本人過往一年睇過的電視節目(係要完全睇過，唔係睇一兩集當睇過晒)：

劇集：
1. 王老虎搶親
咩原因要睇：本身想睇嘉樂仔，諗應該都會幾好笑既!
有冇後悔睇：有d，因為劇本太爛。如果王老虎唔係嘉樂仔做，係一定唔睇囉!

2. 絕代雙驕
咩原因要睇：因為子華，佢已經係一個電視品牌，有佢就係收視保證。另外，都想睇下李綺虹演戲，佢都冇演戲好耐囉，佢d廣東話十年如一日，都係唔正既。
有冇後悔睇：冇。整套劇都ok，仲學到d經濟學既野，子華的內心戲都多左，超正!

3. 古靈精探B
咩原因要睇：因為對上一輯都唔錯，幾有趣。加上對於偵探片，我都幾鍾意睇。
有冇後悔睇：都冇既，勉強叫過得去啦!中規中矩。

綜藝：
1. 星星同學會
咩原因要睇：君如同嘉樂囉，又耐冇睇清淡節目，兩個咁有喜劇感的人做主持，悶極都有個限度。
有冇後悔睇：100%冇，娛樂性十足，寸人都岩timing，嘉賓又唔mind，好睇過獎門人+美女廚房。

2. 美女廚房
咩原因要睇：上一輯口碑唔錯同埋梁生。
有冇後悔睇：有，因為變左賣肉SHOW，成日請d靚模上來，坦胸露臂，發晒姣咁既樣。最重要係我想佢請果個，佢請唔到。唔想見果d，佢就不斷請。唔係畀面梁生，星期日好早熄電視，直至做星星同學會。

3. 千奇百趣
咩原因要睇：森美小儀。
有冇後悔睇：都冇既。起初唔睇好，覺得有d無聊，3個人不停畀珍有d低能，但d日本片確實幾千奇百趣，有時候都令我會O嘴。

4. 蘇GOOD
咩原因要睇：因為果陣冇野睇XD
有冇後悔睇：冇。前幾輯，阿蘇成日串人，有D神憎鬼厭；但今輯明顯收左D火，同埋都唔係純粹介紹食物，有時候都介紹一D鮮為人知的玩樂地方同埋一D社會上既事畀觀眾認識，人文味道都濃厚左

總括而言，係我杯茶我就睇，唔係既話，話之你全城熱播，我都唔會去盲目追捧!