見完工，就同阿媽喺荃新天地行左陣，之後就去左荃灣廣場行，媽媽喺吉之島買左一包蒜蓉包(麻麻地好食)。

然後就搭地鐵去中環既蘭芳園飲下午茶，d野差左，一杯奶茶我落左好多次糖，但都唔係好甜，唉，浪費車錢同茶錢!

好衰唔衰，仲要落毛毛雨，我地又冇帶傘，本來打算係日本城買一把傘，約$14.9，但d傘質素就唔係好好，見唔係大雨，所以冇買到。

來到中環，順道睇埋24號搞既暑期博覽既地點係邊度，點知我地又唔記得地址，所以阿媽要打畀阿崔姨;我打畀阿娟，幫我地搵地址。

點知，d雨又愈落愈大，我地去到一間買衫既舖頭門外避雨，d雨又唔肯停，隻腳已經濕晒(我今日著左波鞋+長褲，所以番到屋企果刻都未乾呀)

非常後悔冇喺日本城買傘，所以等到d雨細左d，阿媽就拉左我過去7-11，但最平都要$49，所以轉去第二間7-11，本來睇中一把粉紅色的傘，都唔算貴，但唔能夠遮兩個人，所以放棄，繼續行番去日本城買傘，為了安全，最後買左把可以遮2個人，價值$35既大傘一把，但當我地買完之後，d雨又細番啦，真係……

算啦，繼續行(因為已經知道目的地)，點知阿媽又帶我行左去婆婆以前住既地方(都唔算行得好遠)，不過已經變左一幢私人住宅大廈。

終於搵到目的地，竟然係一個街市上面(少少O咀)，唔緊要，最緊要知喺邊度姐!

之後就行左去一間碟舖(買既全部都係內地版影碟，但又唔可以叫盜版)，聽到一首好熟識既歌《今宵多珍重》(此版本非由陳百強主唱)，又幾配合個雨景

我地再行入一間m記，坐左一陣之後就決定搭三鐵(地鐵+西鐵+輕鐵)回家，本想搭下天星小輪，阿媽都話夠晒風味XD

不過，今日天氣咁差，搭小輪都睇唔到風景啦(突然想起一首詩歌《風雨念香港》)，會落布擋雨水，所以只好打消念頭。

由上環站搭1個站去中環轉荃灣線，去到中環站，本來已經有一架車，但好多人冇位坐，阿媽話不如搭下一架，因為搭去美孚好耐，企會好辛苦，本來我自己都仲十五十六，見到對面已經有新車番左，即刻同阿媽落車走過去對面車廂，好彩有位坐!

坐到去美孚，就轉西鐵番屯門啦，點知唔小心落左去番紅磡既月台，好彩冇上到車，亦發現有4個著校服既女生同我地一樣去錯月台，咁之後去番屯門既月台啦!

搭西鐵途中，望出窗外，竟然有陽光(畀天氣玩死= =)，但同時又望見天空一片雲海，個心又好似冇咩事咁，有時又見到d山畀雲包著，好似仙境咁，心情靚晒!

番到屋企，一除對襪，果然兩隻腳板都係濕並皺晒皮的。

今日既事教訓我，出街一定要帶傘，同埋知道會落雨就最好帶埋拖鞋出街，因為對腳濕左真係好難頂