頒獎禮於月初就曲終人散，大熱劉醒與九姑娘成功冧莊視帝視后，《義海豪情》奪得4個獎項成為大贏家，不過就失落了「最佳劇集」。如上年一樣，今年TVB的節目都冇點睇過，所謂全城熱播的《公主嫁到》及《義海豪情》都只係間唔中睇一兩集。所以，本人對今年賽果都係沒有任何滿意及不滿意，不過部分賽果真係「離晒大譜」，TVB實在係「愛子心切」呀!都唔洗我講出口係邊幾位啦!點都好啦，以下係我個人對各賽果的意見及心水(只限某些有興趣的項目才顯示)：

最佳劇集：《公主嫁到》
評語：冇咩評語，不過有幾集OK好笑既(其他都係低級趣味)。

最佳男主角：黎耀祥《義海豪情》
評語：都係冇咩評語，不過我就好鍾意頒獎禮果日佢講既爛GAD多d，包括「我呢套係冇獎攞發牛豆!」&「請大家上網睇番上年我既得獎感言啦!」
心水：黃日華《刑警》(一套畀觀眾忽視得好緊要既台慶劇，台慶劇好難得寫得咁好架，華哥重要回娘家拍，應該好有睇頭，但TVB一味吹谷《公》同《義》，都冇點幫《刑》宣傳，浪費晒華哥同個劇本，華哥D內心戲超好，拍個陣仲係前一日背晒劇本先去片場，唔係只記自己個D，人地個D都記埋，咁敬業的演員真係買少見少，TVB咁唔懂得珍惜好演員，難怪華哥話拍完《刑》，以後都唔再幫TVB拍劇!)

最佳女主角：鄧萃雯《義海豪情》
評語：冇乜評語，只記得「我鄭九妹三個字倒轉寫!」

最佳男配角：麥長青《義海豪情》
評語：都冇乜既，略嫌有D浮誇。
心水：林嘉華《鐵馬尋橋》

最佳女配角：陳法拉《義海豪情》
評語：其中一個唔滿意的賽果，套劇雖然冇睇晒，但都覺得晴晴同陽陽呢條線好多餘，既然個角色係可有可冇，咁又點去評論究竟係唔係最佳呢!

我最喜愛的電視女角色︰昭陽公主(佘詩曼 飾)《公主嫁到》
評語：早知道係畀阿余架啦，所以冇咩驚喜!
心水：梁巧芝(蔡少芬 飾)《飛女正傳》(個人比較喜歡係Janet Bin果部分，後半部分下下都唔畀梁巧芝出番黎，係極度自私的行為但又不失可愛；大結局個陣見佢同梁巧芝告別，我又會眼水不斷流喎，好過阿余一味得「刁蠻」呀!)

我最喜愛的電視男角色︰景博(林峰 飾)《談情說案》
評語：只可以話高層鍾意睇chok樣，求其chok下都可以有獎XD
心水：施拾壹(杜汶澤 飾)《女王辦公室》(個角色定位算係基層市民，合晒佢合尺啦，為了生活而做野手法賤格[仲做緊寬頻推銷員個陣]應該難佢唔到啦，不過對住兩個女又要表現得慈父；對住兩個BOSS又要表現得好無奈同帶一點畏懼；咁生活化角色真係唔係個個都handle到，雖然有時佢都會誇張左[因為都要搞下笑的關係]，但確實係今年好突出的角色之一。)

飛躍進步男藝員︰黃浩然
評語：無。

飛躍進步女藝員︰唐詩詠
評語：無。

最佳節目主持︰汪明荃、阮兆祥、李思捷、王祖藍《荃加福祿壽》
評語：其實冇咩意見，但有時候真係覺得麻麻地好笑，同埋希望阿姐唔好再唱流行曲，我下下都要校靜音!

最佳綜藝資訊節目︰《超級巨聲2》
評語：無。
心水：《千奇百趣香港地》(其實香港都有好多奇人趣事，不妨多d發掘身邊的事物同人!)

最佳專業表現大獎︰陳豪
評語：上年都講過係豬肉獎啦，加多左個「專業」兩個字姐，不過阿Mo又幾坦白，話拎左呢個，之後D獎[最佳男主角]都應該凍過水，真係開口中!

tvb.com人氣大獎：林峰
評語：同上年一樣，不如取消左佢，冇咩實質作用!

對於今次既整體賽果，我想引用華哥一個說話:
TVB = Totally Very Bad !!!

P.S. 如果有人想問我，點解有個項目冇填心水既，我係好歡迎各位親自問我既，如果我有答案畀你的話XD(姐係冇答案啦)