頒獎禮早已曲終人散，不過基於先排考同番工，所以到今日先寫BLOG。

好啦，講番少少SHOW後感啦!

先講Opening，一班新人加年輕歌手係度唱學友首《Double Trobule》，隻歌第一句「星光今晚不算光」就已經講明今晚個SHOW其實都冇大粒星，TVB係唔知定有意，一開始就玩自嘲，跟住女歌手就就坐住跑車入場，氣勢都有d既，問題係條路都幾窄，女歌手落車都好辛苦下；而d男歌手就迎接「香車美人」啦，但我唔明點解d男歌手行出來要翹住女dancer出場囉，搞到個出場好似選香港小姐咁

OK，咁之後都一人拖住一個女歌手(CHOK王一拖二，真係親生仔就著數d)，係個台上面行半個圈，跟住就左係中間一字排開啦，但last個pair都未企好，佢地就不斷係個舞台上互相穿插，可能本身安排就係咁，但就真係好亂囉。跟住，伍姑娘同草蜢就出場啦，又唱「華麗舞台」，都冇所謂啦，反正上年真係得一隻歌，呢隻仲要係果晚唯一一隻可以唱首成首的得獎歌。冇錯，因為opening一完左，宣佈第一首金曲就係草蜢隻歌，我都ok既，唔洗再聽第2次就啦!

之後一路d賽果都有少少唔尋常，當志偉哥宣佈第3首金曲係IVANA隻《水百合》，我就知之後d獎應該有d野既，因為冇理由《末日》冇得唱，forum都傳過《末日》係金曲金架，但我果刻只係認為《水》取代左《末》，咁姐係TVB有心要做就《chok》拎金曲金的成數就更加高。

而結果係點呀? 所有人包括我，都係一個毫無先兆的情況下，親眼親耳聽見主持大大聲宣佈「亞太區最受歡迎女歌星」— 就係IVANA

我充分感受到IVANA果刻真係受驚過度，嚇到呆左，仲講左句「唔係呀嘛?」，當其他女歌手都異口同聲表示肯定，加上志偉哥向Ivana展示埋個得獎信封，IVANA先至行落台接受大家掌聲。坦白講，我地好清楚IVANA實際的亞太區成績未必好出眾，然而佢之後一番感言，非常有大將之風，亦承諾會努力做音樂，聽完之後，湧起無名的感動。畢竟IVANA係好欣賞的女歌手，實在唔希望因為呢d黑箱作業的頒獎禮，而為佢的音樂事業蒙上污點。但你問我IVANA係咪完全唔值得拎亞太，我答你「唔係」，因為Ivana的才華係無容置疑，事實上多年前亦有發行國語唱片，在台灣也有一定樂迷，佢亦都承諾會繼續做好音樂，唔會辜悔大家對佢的期望，所以我覺得只係時間上問題，大家未必覺得Ivana實至名歸，但假以時日，佢會用行動證明一切，真真正正讓亞太區認識Ivana的音樂。

講完亞太女，咁亞太男、最男同最女都係上年果3個，唔想多講。但問心，我係好想EDMOND拎最男，因為EDMOND的今年成績無疑係名單之中最為顯注，有人話《一再問究竟》係有潛質繼《七友》之後成為經典作，而質素之高係唔需要懷疑，對比《CHOK》同《爆了》，根本就高下立見；論派台成績，即使古sir後尾派《Once upon a time》，都冇辦法追上《一》的流行度，我只可以話EDMOND係輸後台，唔會係輸成績。而當我聽到金曲金係《CHOK》，我就更加肯定我既剛才的結論，事後亦都不少人支持其他歌拎金曲金(包括《一》)。

當然我明白呢個係一場遊戲，係基於娛樂性為前題，不過TVB你唔應該玩得咁盡，始終真係其他歌都好過呢首囉。論流行，你可以畀《花千樹》；論藝術嘗試，《水百合》不為過；論意義，《一再問究竟》《天梯》亦大有故事，點解係《CHOK》呢? 真係諗唔明!

全晚最期待除左EDMOND同IVANA之外，就一代天后SALLY，本以為今日都係好似前年拎金針獎咁唱一段MEDLEY，雖然到最後都只係唱左隻《信自己》，但有勁歌熱舞，都好正啦，SALLY話自己都冇咩氣，但比起跌WATT仲勁既王菲，水準已經唔錯啦。

今晚另一個驚喜就係藍奕邦拎唱作金，第一次聽晚晚禮拜六，好正，而佢唱歌個陣後面都有好多歌手一齊打拍子，我仲見到EDMOND原來都識唱晚晚禮拜六架!!!  呢d帶動唱，真係買少見少，對上一次係EDMOND出席CASH個歌唱比賽，做表演嘉賓唱《七友》，好多觀眾都一齊跟住唱。