今日係陸運會既第二日，亦都係最後一日，o係琴日，我報左2項賽事，100m同推鉛球，結果都係空手而回，我一早知會係咁架啦，唔緊要，下年再黎過!

好!講番今日啦，坐左成大半日，睇左好多健兒o係條跑道度不斷跑黎跑去，講真都幾悶下，好唔容易先等到佢進行「親子師生接力賽」，點解我好似咁期待睇呢場比賽，皆因莫sir有份跑!haha~

咁我同kiko講莫sir會落場跑，佢仲拎部相機出黎錄低佢!XD

到左比賽開始啦，只係眼見到第一棒既阮sir跑得好跑，連追上好幾個學生，跟住個d，由於太遠，所以唔知邊d老師跑緊。到左最緊張既第四棒啦，嘩!d人對腳好似裝左摩打咁，轉過頭又唔見左人啦，咁唔洗問，你地都應該估到邊個包尾啦，莫sir接左棒之後，就一路係咁跑，係咁跑，但唔知係咪做唔夠熱身啦，佢一路跑既時候，一路按下自己隻腳，我地全校見到佢咁，o係看台度全部企晒身，一路拍手鼓勵佢，好唔容易，終於過左終點啦，但莫sir已經成個人軟晒啦，要好幾個人扶佢去一張椅度坐，不過唔緊要，有體育精神就得啦!之後，我同阿媽就去左食飯啦。

我地去度卓爾居，本來諗住食KFC，但多人又貴，所以就去左樓上既美心快餐食飯啦。去度美心，都一樣多人，但起碼又經濟又實惠呀!我叫左一個豉油雞飯，阿媽就叫左洋蔥牛柳飯啦，咁阿媽就去排隊，排排下個陣，佢突然問我電話o係邊，我就唔知既，所以一味o係阿媽件褸到搵，我又搵唔到喎，之後攪到佢隊都9排，走番過黎搵電話，點知我發原來個電話o係阿媽件褸裡面既暗袋度，唔好意思，阿媽，攪到你又要排多次隊!

過左無幾耐，我地就食完飯行番番去運動場，番到去，見到d啦啦隊又o係度練習，過左無幾耐，又開始排隊點名啦!

點完名之後，就繼續賽事啦，好啦!終於到啦啦隊比賽啦，首先出場既o係橙、黃、紅同綠。好啦，比完賽啦，又到左宣佈結果既時候啦，橙社同黃社只係得700幾分，到左老師話冠軍果隊有954分，亞軍有904分既時候，滿心以為，一定係紅社拎冠軍，點知佢竟然話係綠社，我真係好想小喇叭佢呀!明明跳得最好既係紅社，其實唔單上我咁諗，我阿媽話好多家長都認為紅社跳得好好，但點解結果係咁架?後尾，我見到佢地喊，我初頭都冇喊既，因為我冇份跳，但唔知點解後尾自己都有喊囉，唉!丁丁之後講番，佢話俾分個d人係綠社架喎，唔怪只得啦，大佬，做馬都唔好做到咁離譜啦，想天怒人怨咩?

唉!雖然過左一陣，我同佢地都已經冇喊，仲o係臨走之前，跳多次隻舞，跳既時候，好多人都繼續強忍淚水。跳完之後，就執番d野走人，丁丁話:「咁辛苦練隻舞，練左幾個月，為左咩姐?都係為左個獎姐!唉!」其實，雖然我冇份跳，但我都知佢地好早開始排舞，一直排到宜家，但咁又點呀?負出既努力同結果係唔會成正比架!

之後，我就同檸檬搭輕鐵番屋企，但之後佢又話有事，所以我自己搭左751走先，去到屯門站，我就落車轉505，等505既同時，有一個由印尼黎既印傭，話殷三聖村打工喎!但佢又好似唔識路咁，可惜，我唔想聽印尼話，所以幫唔到佢。505番到去三聖個陣，我突然見番3個o係劉伍英既同學，蕭進希，曾麗琪同鍾鳳珊，但佢地好似已經唔認得我咁，咁又係既，兩年冇見，唔記得，有咩出奇，唉!今日既我，真係經歷左人情既冷暖!