今日真係「有強權而冇公理」，個電腦阿sir可以咁屈......

當然，時間係上緊電腦課，個電腦阿sir遲遲都未嚟，咁我哋成班同學咪開始講嘢。

之後個阿sir就入嚟，睇佢個死人惡樣，就知佢同人哋有爭拗，之後又拗唔贏。

跟住佢見到成班傾偈，就借機搵我哋出氣。

「依家要查書！」佢條腸粉講，由於平時都唔會教書上面嘅內容，查我哋書，梗係冇啦。於是記曬全班名。

之後我暗地攞部電話出嚟睇時間，佢就對我講：「攞部手機出嚟用做咩呀？」

「睇時間。」我用平常心去對佢講。

「睇時間咁又做咩攞出嚟用呀。」佢條腸粉腸又講。我以無言去對佢，你吹得我脹咩?我就費事應你！

差唔多落課嘅時候，佢叫我起身，就問：「用電話就叫電話，咁即係唔用電話就唔叫電話。」

又問我點樣先叫用電話，我就話打電話，send訊息之類。

佢又講凳仔要坐就叫凳仔，唔坐就唔叫凳仔呀。我又費事理佢。

之後我又諗咗一段嘢，就話：我攞電括同用電話嘅差別好大喎！阿sir。用電話係限於打電話，send訊息之類啵。

而攞電話出嚟係可以睇時間，聽歌，睇片之類喎，你話用電話，咁算點先？我依家係攞電話，唔係用電話。

可惜我太善良，冇去講呢句嘢。結果:要我哋成班因為嘈而寫檢討書。

你咁話我，我都未叫你寫檢討書，我依家反而叫我寫？你咩事呀？自己發脾氣仲搵我哋嚟出氣。

所以話呢，有強權冇公理，呢啲咁嘅人，我唔買起佢都算佢好彩。